27 января 2016 г.
Пособи виçи ỹсет
2016 çулхи февралĕн 1-мĕшĕнчен çемьене тăлăх ачана йышăнакансене пĕр хутчен паракан пособи виçи ỹсет. Районта ашшĕ-амăш хỹтлĕхĕсĕр тăрса юлнă ачасене çемьене вырнаçтарас юхăм вăйлă тесен те юрать. Ку енĕпе республикăри ытти районсемпе танлаштарсан пирĕн районта пурăнакансем тăлăх ачасене ытларах усрава илеççĕ. Тăлăхсене хăйсен çуначĕ айне илнĕ ют ашшĕ-амăшне уйăхсерен укçан хавхалантараççĕ, ачасене те пурăнмалăх, вĕсен ỹсĕмне тата хевтесĕрлĕхне кура, патшалăх бюджетĕнчен кашни уйăхрах укçа куçать. Унсăр пуçне ют ачана хăйсен хỹтлĕхне илекен çемьене пĕр хутчен паракан пособипе хавхалантараççĕ. Унăн виçи пĕлтĕр 14497,80 тенкĕ пулнă, кăçал вара 16266,53 тенкĕ. Инвалид ачана, 7 çултан иртнĕ ачана, пĕртăвансене усрама илсен пособи виçи тата пысăкрах - 124 пин те 289 тенкĕ те 55 пус (пĕлтĕр ун виçи 110 пин те 775 тенкĕ пулнă). Оперативлă кăтартусем тăрăх, 2015 çулта республикăра пурĕ 450 тăлăха çемьене вырнаçтарнă, 8 млн тенке яхăн тăкакланă.
7 процент хăпарĕ
2016 çулхи февралĕн 1-мĕшĕнчен федераллă çăмăллăхсен виçи 7 процент ỹсĕ, çав шутра соц-пакет виçи те. Иртнĕ çулсене танлаштарнă май асăннă çăмăл-лăхсем апрель уйăхĕнче ỹснине палăртма пулать. Кăçал вара февраль уйăхĕнчех çăмăллăхсемпе усă курĕç.
Туристсене компенсаци парĕç
2016 çулхи январĕн 1-мĕшĕнчен тытăнса организаци ĕçченĕсене Раççей территорийĕнче ирттернĕ отпускăн тăкакĕсене 50 пин тенкĕ таран компенсацилеме пултараççĕ. Асăннă компенсацие икĕ майпа тавăрса пама пăхнă: ĕç паракан тата налук инспекцийĕ урлă. Çулçỹрев пĕр çын пуçне 50 пин тенкĕрен иртет пулсан та 50 пин тенкĕ тавăрса парĕç. Сахалрах тăкакланă пулсан вара _ мĕн чухлĕ тăкакланине кура. Компенсаци тỹлемеллисен шутне мăшăрне, 18 çула çитмен ачисене те кĕртме пултараççĕ.
Экзаменсем хушăнаççĕ
2016 çулхи тĕп çĕнĕлĕх - 9-мĕш класра вĕренекенсен экзаменсем хушăнни. Кăçал 9-мĕш класра вĕренекенсен пурин те вырăс чĕлхипе, математикăпа экзаменсем тытнисĕр пуçне тата списокри икĕ предмета суйласа илмелле. Списокра çаксем: физика, хими, биологи, литература, географи, истори, обществознани, ют чĕлхе, информатика. Кăçал суйласа илнĕ икĕ предмечĕн экзаменĕнчи кăтартăвĕ аттестатра палăрмасть, 2017 çулта вара çавна шута илĕç. А.САН.
Студентсемпе шкул ачисене субсиди тỹлемĕç
Республикăра унччен шкул ачисемпе студентсене общество транспорчĕпе çỹремелли уйăхлăх билета туяннăшăн субсиди панă. Уйăх вĕçнелле вĕсен карточки çине 390-420 тенкĕ куçнă. Халĕ улшăнусем кĕртнĕ. Малашне студентсемпе çамрăксене кунашкал компенсаци памĕç. Саккун январĕн 11-мĕшĕнчен вăя кĕнĕ. Малашне пособипе сахал тупăшлă çемьерисем çеç усă курма пултарĕç. Ун валли вĕренỹ учрежденийĕнче заявлени çырмалла, сахал тупăшлă çемье пулнине ĕнентерекен справка тăратмалла. Ку хулаçум, чугун çул транспорчĕпе çỹрекенсене те пырса тивет.
А.ВЛАДИМИРОВА.
Источник: "Пирěн пурнăç"