05 февраля 2016 г.
21-мĕш ĕмĕрĕн пуçлăмăшĕнче кил-çуртсене газ кĕртнĕ вăхăта пирĕнтен чылайăшĕ астăвать пулĕ тесе шутлатăп. Шăпах çав вăхăтра паллашма тỹр килчĕ те манăн "Красночетайгаз" предприятире ĕçлекен, Хĕрлĕ Чутайра пурăнакан Владимир Кучекеевпа.
Владимир Геннадьевич Кучекеев 1961 çулхи февралĕн 6-мĕшĕнче Свердловск облаçĕнче çуралнă. 1978 çулта вăл Хĕрлĕ Чутайри вăтам шкултан вĕренсе тухнă. 1979 çулта Северодвинск хулинче электросварщик профессине алла илнĕ. Унтан çар ретĕнче тăнă, Балтика флотĕн-че подводник пулнă. 1982 çулта "Октябрь" совхозра ĕçлеме пуçланă. 1984-1987 çулсенче МПМК-ра тата ремтехпредприятире тăрăшнă. 1987 çулта газ енĕпе ĕçлеме шут тытнă. Ĕпхỹ хулинче пĕлỹ илсен Мускаври "Центрподводтрубопроводстрой" 1№ трестра вăй хума тытăннă. "Уренгой-Помары-Ужгород" газопровод çинче ĕçленĕ май хамăр тăрăхри Сăр, Атăл юханшывĕсем урлă каçарнă çĕрте тата Ярославль хули патĕнче тăрăшнă.
1993 çулта çемьерен уйрăм пурăнас мар тесе каялла яла таврăннă. "Чувашсельхозмонтажăн" Муркашри уйрăмĕнче ĕçлеме тытăннă. Унта Муркаш, Етĕрне, Хĕрлĕ Чутай районĕсенчи ялсене газ кĕртес енĕпе тăрăшнă. 1998 çулта районта уçăлнă "Красночетайгаз" предприятире вăй хума тытăннă. Çав вăхăтсенче асăннă предприяти ĕçченĕсем районти ялсене, кил-çуртсене газ çитерес тесе нумай тăрăшнă.
- Предприятире ĕçлекенсен йышĕ 50 çынна çитрĕ. Паянхи кун вĕсем пурте ман куç умĕнчех. Вĕсенчен чи пысăк разрядли Владимир Геннадьевич Кучекеев пулса. Районта "Красночетайгаз" предприятие туса хума шутларăмăр, анчах та требованипе пире малтан 4-мĕш разрядлă сварщик кирлĕччĕ. Шыраса тупрăмăр, вăл - Владимир Кучекеев. Предприяти хута кайрĕ. Апла пулсан, предприяти уçăлнинче Владимир Кучекеевăн та тỹпи пур.
Предприятин пурлăхне хамăр алăсемпех çултан-çул пуянлатса пытăмăр, ун чухне те В.Кучекеев пĕр ĕçрен те пăрăнмастчĕ. Каменщик та, штукатур та, пăтине те çапма ỹркенместчĕ вăл. Владимир Геннадьевич коллективра чи лайăххиччĕ, чи активличчĕ, обществăлла мероприятисене те хаваспах хутшăнатчĕ. Пĕр сăмахпа каласан, Кучекеев маттур, пултаруллă, ун пек сварщик районта çук-ха, - пĕлтерчĕ 1998-2005 çулсенче "Красночетайгаз" предприятие ертсе пынă Иван Лаврентьевич Хораськин.
2011 çултанпа 6-мĕш разрядлă электросварщик "Мостотрест" УАО филиалĕн "Мостоотряд-41" фирма ĕçченĕ шутланать. Кỹршĕ Етĕрне районĕнче Сăр юханшыв урлă кĕ-пер тунă, Сочире Олимпиадăна хатĕрленнĕ çĕре хутшăннă. Халĕ Мускавра кĕперсем тунă çĕрте ĕçлет.
Çавăн пекех В.Кучекеев алă усса ларма кăмăлламасть, пысăк опытлă специалист пушă вăхăтра çынсене кил-çуртсенчи ăшă пăрăхĕсене хальхи йышшисемпе улăштарма та пулăшать. Ăна ăста тенисĕр пуçне, унăн аллинче ĕç вĕрет тесе те çирĕппĕнех калама пулать. Çакна Хĕрлĕ Чутай центрне кĕрекен урамри вĕсен икĕ хутлă çурчĕ те çирĕплетет.
Владимир Геннадьевич мăшăрĕпе, Алевтина Николаевнăпа, ывăлпа хĕре çут тĕнче парнеленĕ. Алевтина Николаевна район администрацийĕнче çул çитмен ачасемпе тата вĕсен прависене хỹтĕлес енĕпе ĕçлекен комиссийĕн тĕп специалистĕнче тăрăшать. Ывăлĕ Игорь Ялхуçалăх академийĕнче экономист профессине алла илнĕ, паян уйрăм предприниматель шутланать. Хĕрĕ Анна Шупашкарти коопераци техникумĕнче вĕреннĕ, Мускавра çуртсем тăвакан комбинатра вăй хурать.
Кучекеевсен çемйи хитрелĕхе курма пĕлни те курăнать. Çуллахи вăхăтра иртен-çỹрен вĕсен картишĕнче тĕрлĕ эрешсемпе сăнарсем курса савăнать. Паян Алевтинăпа Владимир Кучекеевсем хĕрĕн çемйипе пĕр кил-çуртра пурăнаççĕ. Иртнĕ çул вĕсен çут тĕнчене виççĕмĕш мăнук килчĕ. Кучекеевсене мăнукĕсемпе районти мероприятисенче час-часах курма пулать, çакăнта палăрмасть-ши вĕсем мăнукĕсене юратни?!
А.ОРИНОВА.
Источник: "Пирěн пурнăç"