12 февраля 2016 г.
Пĕрешкел ятпа çỹрекен каччăпа хĕре пурнăç çулне пĕр тĕвве çыхма пỹрни сайра тĕл пулать пулĕ. Çапах та пур пирĕн хушăра ун пеккисем те. Вĕсемпе час-часах курнăçатпăр, пĕрле ĕçлетпĕр, пĕрле савăнатпăр, пĕрле хурланатпăр... Хусанушкăнь ялĕнче пурăнать çак телейлĕ мăшăр. Валентинпа Валентина Харитоновсем çемье çавăрнăранпа кăçал 45 çул çитет.
Валентин Ефимович Хусанушкăнь ялĕнче 1947 çулхи апрелĕн 10-мĕшĕнче, Валентина Ивановна Çĕн Ирчемес ялĕнче 1946 çулхи августăн 30-мĕшĕнче çуралнă. Каччă 1969-1970 çулсенче И.Я.Яковлев ячĕпе хисепленекен Чăваш патшалăх педагогика институчĕ çумĕнчи физкультура учителĕсене хатĕрлекен курссене пĕтернĕ, унтан тăван ялĕнчи шкулта ĕçлеме пуçланă. Хĕр те асăннă вĕренỹ заведенийĕнчех математика факультетĕнче пĕлỹ илнĕ. Дипломлă специалист пулсан направленипе Хусанушкăнь шкулне килнĕ. Икĕ çамрăк учитель 1971 çулта çемье чăмăртанă.
Харитоновсем шкулта ĕçленĕ хушăра пĕри физкультурăпа, тепри математикăпа ачасене тăрăшса вĕрентнĕ. Валентин Ефимович шкулта 12 çул хушши ĕçленĕ хушăра универсаллă спортсмен пулнă, спортăн нумай енĕпе район чемпионĕн ятне тивĕçнĕ. Хăйĕн вĕренекенĕсен çитĕнĕвĕсем те ăна савăнтарнă, шкул чысне çỹле çĕкленĕ. Тăрăшни сая кайманни малалла тата ытларах ĕçлеме хавхалантарнă. Валентина Ивановна математикăпа вĕрентнĕ хушăрах директорăн вĕренỹпе воспитани енĕпе ĕçлекен çумĕ те пулнă. 38 çул хушшинче сахал мар ачана вĕрентсе кăларнă вăл, экзаменсене тимлĕ хатĕрленĕ. Класс ертỹçинче те чылай тăрăшнă. Чуна парса ĕçленине кура Чăваш Республикин Вĕренỹ министерствин Хисеп хутне те тивĕçнĕ. Шкултан вĕренсе тухнисем вĕсене манманни хĕпĕртеттерет тата хавхалантарать.
Харитоновсен йăх-ăру тăсăмĕ малалла аталанать. Мăшăр виçĕ ача пăхса ỹстерсе пурнăç çулĕ çине кăларнă. Пурте Шупашкарта тĕпленнĕ. Асли, Алина, Мускаври медицина училищине вĕренсе пĕтернĕ. Каярахпа И.Н.Ульянов ячĕллĕ Чăваш патшалăх университетĕнче филологи факультетĕнче ăс пухнă. Хальхи вăхăтра Шупашкарти БСМП-ри янахпа пит хирургийĕн уйрăмĕн аслă медицина сестринче вăй хурать. Алинăн йĕкĕреш хĕрĕсем Дианăпа Кристина Мускаври юридици академийĕнче суд эксперчĕ пулма вĕренеççĕ. Вăталăх ывăлĕ Витя И.Я.Яковлев ячĕпе хисепленекен Чăваш патшалăх педагогика институчĕн ỹнерпе графика факультетне пĕтернĕ. Тĕп хулара бизнес ĕçĕпе тимлет. Унăн Дима ывăлĕ 10-мĕш класра вĕренет. Харитоновсен кĕçĕн хĕрĕ, Марина, И.Н.Ульянов ячĕллĕ Чăваш патшалăх университетĕнче филологи факульте- тĕнче вĕреннĕ. Халĕ вăл "Элкомра" - компьютер консультанчĕ. Унăн Евгения хĕрĕ 6-мĕш класра ăс пухать. Тăватă мăнукĕшĕн Харитоновсем савăнаççĕ. Килнĕ хăнана яланах тарават кĕтсе илеççĕ вĕсем, типтерлĕ пурăнаççĕ. Хăтлă та капăр кил-çурт, хуçалăх çавăрнă. Иккĕшĕ те кăмăллă, пĕр-пĕрне килĕштерсе, куçран пăхса пурăнаççĕ. Сывă пурнăç йĕркине тытса пыраççĕ. Кил хуçи - ылтăн алăллă, тем ăсталама та маçтăр. Ĕçе килĕшỹллĕ тăвать, унăн аллинче кирек мĕнле ĕç те вĕресе тăрать. Çирĕп те куçа килĕ-шекен япала тума питĕ ăста, пăхсан чун киленет.
1993-2005 çулсенче Валентин Харитонов Раççей патшалăх страхлавĕн районти уйрăмĕнче агентра, 2005 çултанпа пенсие тухиччен "Зенит" страхлав обществăн консультантĕнче тăрăшнă, хисеп хучĕсене, "Çулталăкри страхлакан тĕп агент" ята темиçе хут та тивĕçнĕ. Валентин Ефимович çулсерен районти тата республикăри спорт ăмăртăвĕсене хастар хутшăнать. Аслă ăрури çынсем хушшинче 2007 çултанпа çăмăл атлетикăпа, йĕлтĕрпе чупассипе, сĕтелçи теннисне выляссипе призерсен шутĕнче. Пĕлтĕрхи июль уйăхĕнче 100 тата 200 метра чупса республикăри 65-69 çулхи ветерансемпе ăмăртса чемпион ятне тивĕçнĕ. Август уйăхĕнче вара Челябинск хулинче чăрмавсем урлă сиксе 110 метра тата 4х100 метрлă эстафетăра ăмăртса пĕрремĕш вырăна тухса медальпе диплома тивĕçнĕ.
Валентинпа Валентина Харито-новсем иккĕшĕ те - ĕç ветеранĕсем. Телейлĕ те ырă ята тивĕçнĕ хисеплĕ мăшăра малашлăхра та ыррине кăна сунас килет. Светлана ЯРУТКИНА, Сĕнтĕкçырми ялĕ.
Источник: "Пирěн пурнăç"