26 февраля 2016 г.
- Февралĕн 19-мĕшĕнче ЧР Патшалăх Канашĕн депутачĕ Валерий Павлов пулăшнипе районта хĕллехи полиатлон енĕпе республикăри чемпионачĕпе первенстви иртнĕ. Ăмăртăва хутшăнакансем вăй гимнастикинче, пневматикăллă винтовкăран перессипе тата йĕлтĕрпе чупассипе тупăшнă. Уйрăм кăтартусенче пирĕн районтан 16-17 çулхи хĕрсемпе каччăсем хушшинче Анастасия Семенова (1-мĕш вырăн), Роксана Хромова (2), Евгения Герасимова (3), Кирилл Андрианов (1), Евгений Вазин (2), 18-20 çулхи хĕрсем хушшинче Вероника Егорова пĕрремĕш, 60 çултан аслă хĕрарăмсем хушшинче Людмила Михуткина иккĕмĕш тухнă.
- Февралĕн 20-мĕшĕнче Федераллă Миграци службин районти уйрăмĕнче Çамрăк суйлавçă кунне халалланă мероприяти иртнĕ, унта 14 çул тултарнă çамрăксене Раççей гражданинĕн паспорчĕсене панă.
- Хĕрлĕ Чутай шкулĕнче вĕренекен Никита Ульянов çак кун Елчĕк районĕнче пулса ирĕклĕ майпа кĕрешекенсен ăмăртăвне хутшăннă. Тăтăшах республика ăмăртăвĕсенче çĕнтернĕ тата призер пулнă çамрăк спортсмен хальхинче виççĕмĕш вырăн йышăннă.
- Февралĕн 21-мĕшĕнче Муркаш районĕнче "Урожай" физкультурăпа спорт обществи пуçарнипе йĕлтĕрпе чупас енĕпе ăмăртусем иртнĕ. Унта республикăри 12 вăйлă команда, вăл шутра хĕрлĕчутайсем те, хутшăннă. Владимр Мурайкин, Вячеслав Дадюков, Алевтина Дадюкова, Валентина Кондратьева ăмăртуран грамотăсемпе тата медальсемпе таврăннă.
Источник: "Пирěн пурнăç"