02 марта 2016 г.
Районта пурăнакан пĕр арçынна ултă çул каялла район сучĕ 158-мĕш статьяпа айăпласа ирĕксĕр хăварнă пулнă. Икĕ çул та ултă уйăх тĕрмере ларса тухнă хыççăнах вăл тепĕр преступлени тунă та "кирпĕч шутлама кайнă", çулталăк та ултă уйăх иртсен ирĕке тухнă. Анчах та йĕплĕ пралук леш енчи пурнăç ăна ăс кĕртсе çитереймен пулас, нумаях та пурăнман, тỹрĕ çултан пăрăнса саккуна хирĕçле тепĕр ĕç тунă. 2016 çулхи январĕн 26-мĕшĕнче юлташĕсемпе эрех ĕçсе пуçа лайăхах минретнĕ хыççăн вăл ыттисем асăрхаманнипе тата юлташĕ çывăрса кайнипе усă курса вăрă-хурахла преступлени тунă: сумкăран сакăр пине яхăн тăракан сотовăй телефон кăларса илнĕ. Ют çын пурлăхне хапсăннăшăн тата пысăк тăкак кỹнĕшĕн çак арçыннăн черетлĕ хут явап тытма тивĕ.
Э.КОНДРАТЬЕВ, районти полици уйрăмĕн следователĕ.
Источник: "Пирěн пурнăç"