04 марта 2016 г.
Раççей Правительствин пуçлăхĕ Дмитрий Медведев мартăн 1-мĕшĕнче Шупашкарта Правительство çуртĕнче ĕçлев рынокĕнчи лару-тăрăва тата ĕçлеве пулăшмалли мерăсене халалланă канашлу ирттерчĕ. Унта Ольга Голодец вице-премьер, РФ ĕçлев тата вĕренỹ министрĕсем Максим Топилинпа Дмитрий Ливанов, Раççей Президенчĕн федерацин Атăлçи округĕнчи полномочиллĕ представителĕ Михаил Бабич, çĕршывăн темиçе регионĕн ертỹçисем хутшăнчĕç.
Дмитрий Медведев премьер-министр асăннă ушкăнпа тата Чăваш Ен Пуçлăхĕпе Михаил Игнатьевпа пĕрле Шупашкарти халăха ĕçпе тивĕçтерекен центра тата Шупашкарти электромеханика колледжне çитсе курнă. Правительство Председателĕ вакансисен электронлă базипе тата халăхпа мĕнле ĕçленипе паллашнă. ЧР ĕç тата социаллă хỹтлĕх министрĕ Сергей Дмитриев пĕлтернĕ тăрăх, лайăх енсенчен пĕри - республикăра ĕç рынокĕнчи çивĕчлĕхе ỹсме паман. 1600 çынна вăхăтлăх ĕçсене явăçтарнă, 1300 çынна професси пĕлĕвĕ илме пулăшнă. Халăха пулăшупа пахалăхлăрах тивĕçтерес тĕллевпе электронлă черет, вакансисен базине йĕркеленĕ.
Премьер-министра микроавтобус çинче вырнаçтарнă мо-бильлĕ ĕçлев центрне те кăтартнă. Çакă вырăна çитсе халăха патшалăх пулăшăвĕпе тивĕçтерме май парать. "Эпĕ кун пеккине пĕрремĕш хут Чăваш Енре куратăп. Питĕ меллĕ. Кун пек офис уйрăмах аякра вырнаçнă регионсемшĕн лайăх", - палăртнă Дмитрий Медведев. Премьер-министр электро-механика колледжĕнче HAAS техника вĕрентĕвĕн центрĕнче пулнă. Ку центрта студентсем "Программа управленийĕпе ĕçлекен станок операторĕсем" профессие алла илеççĕ, вĕренỹ юхăмĕн-че вĕсем тĕнче практикинче усă куракан модульлĕ технологисемпе ĕçлеме хăнăхаççĕ. 2008-2015 çулсенче кунтан 1150 çын вĕренсе тухнă.
Асăннă колледжрах 2013 çултанпа Пысăк технологиллĕ электроникăпа ĕçлекен специалистсемпе рабочисем хатĕрлекен "Элара" ресурс центрĕ ĕçлет. Дмитрий Медведев премьер-министр ун ĕçĕпе те кăсăкланнă. Ку центрта та кирлĕ професси кадрĕсем хатĕрлеççĕ. Радиоэлектроника аппаратурисен тата приборсен монтажникĕ, регулировщикĕ профессисемпе 200 çын вĕренсе тухнă.
Кĕскен калас-тăк, электромеханика колледжĕ нумай профильлĕ професси вĕрентĕвĕн организацийĕ шутланать (5 професси, 14 специальность, 50 ытла професси енĕпе профильлĕ специалистсем хатĕрлет). РФ вĕренỹ тата наука министрĕ Дмитрий Ливанов палăртнă тăрăх, Чăваш Енре тăхăр класс хыççăн вĕренме каякансен 55 проценчĕ техникумсемпе колледжсенчен вĕренсе тухса ăнăçлă ĕçе вырнаçать. Сăмахран, электромеханика колледжĕн выпускникĕсен ĕçе вырнаçас шайĕ 93 процентпа танлашать.
Источник: "Пирěн пурнăç"