11 марта 2016 г.
Нумаях пулмасть районта Раççейри кино тата Чăваш Енри Ĕç çыннин çулталăкĕсене савăнăçлă лару-тăрура уçрĕç. Мероприятире тĕрлĕ организацисенче ĕçлекенсем хисеп хучĕсене тивĕçрĕç.
Уяв каçĕнче хисепе тивĕçнисенчен пĕри райпон Пантьăкри лавкка заведующийĕ Роза Захарова пулчĕ. Нумай çул хушши тỹрĕ кăмăлпа ĕçленĕшĕн ăна Чăваш Республикин Патшалăх Канашĕн Хисеп грамотине парса чысларĕç. Роза Николаевна суту-илỹ ĕçĕнче 1983 çултанпа вăй хурать. Çак хушăра вăл хăйĕн ĕçне тивĕçлĕ шайра пурнăçланипе, плана ирттерсе тултарнипе палăрнă.
Маттур хĕрарăм ялта пурăнакан ытти çынсем пекех выльăх-чĕрлĕх тытать, пахчара тăрмашать. Шел те, мăшăрĕ темиçе çул каялла çĕре кĕнĕ Роза Николаевнăн. Халĕ вăл ялта хунямăшĕпе тата район больницинче программистра тимлекен ывăлĕпе пурăнать. Фармацевтра ĕçлекен хĕрĕ вара çемйипе Шупашкарта тĕпленнĕ. Кукам ятне те илтнĕ Роза Захарова, мăнукĕшĕн питĕ савăнать. Ырă кăмăллă та ĕçчен хĕрарăма ял-йыш ырăпа асăнать. Курăмлă ĕçлесе пынăран Роза Захарова ĕçтешĕсем хушшинче те хисепре.
А.ТИМОФЕЕВА.
Источник: "Пирěн пурнăç"