11 марта 2016 г.
Пульăпа перессипе салтак çулне çитмен çамрăксем хушшинче республикăра февраль уйăхĕнче иртнĕ ăмăртусене мартăн 2-мĕшĕнче пĕтĕмлетнĕ.
Асăннă ăмăртусем çулсерен оборонăпа массăллă тата спорт уйăхлăхĕ вăхăтĕнче ЧР Вĕренỹпе çамрăксен политикин тата Физкультурăпа спорт министерствисем, Раççей ДОСААФ-ĕн регионти уйрăмĕпе ЧР Çар комиссариачĕ йĕркеленипе иртеççĕ.
Кăçал пĕчĕк калибрлă винтовкăран пульăпа персе хăйсен ăсталăхне кăтартма республикăри 18 районти 25 команда кăмăл тунă.
Хĕрлĕ Чутай шкулĕнчи кадет класĕнче вĕренекенсем асăннă ăмăртусене тăтăшах хутшăнаççĕ, кăçал вара тỹ-рех икĕ команда хутшăннă. Вĕсенчен пĕри 277 очко пухса пĕрремĕш вырăна тухнă. Çĕнтерỹçĕ-команда йышĕнче Артем Романов (11-мĕш класра вĕренет), Виктор Миронов, Станислав Можайкин, Роман Карпов, Станислав Михопаркин (10-мĕш кадет класĕнче вĕренекенсем) пулнă. Тепĕр командине вара призерсен йышне кĕме пĕр очко çитеймен - вĕсем тăваттăмĕш вырăн йышăннă. Çапах та асăннă ăмăртусене кăçал пĕрремĕш хут хутшăннă Юрий Степанов, Алексей Дадюков, Юрий Дмитриев, Константин Секайкин, Юрий Яндайкин хăй-сенчен мĕн килнине пĕтĕмпех тунă.
Палăртмалла, ăмăртура хăйĕн пульăран перес ăсталăхне кăçал Евгения Герасимова кадет та тĕрĕслесе пăхнă, харпăр хăй кăтартăвĕсемпе вăл хĕрачасем хушшинче пуринчен те лайăх пени палăрнă (70 очко пухнă). Ăмăртăва хутшăннă пур çамрăк хушшинче вара Женьăн кăтартăвĕсем виççĕмĕш пулнă.
Яшсем хушшинче харпăр хăй кăтартăвĕсемпе Константин Секайкин 2-мĕш вырăн йышăннă (72 очко), Станислав Можайкин - виççĕмĕш (64 очко). Хĕрлĕ Чутай шкулĕнче вĕренекенсен черетлĕ çитĕнĕвĕ, паллах, çамрăксенчен хăйсенчен тата вĕсемпе ĕçлекен Эдуард Романов педагогран килнĕ. Вĕренекенĕсене тĕл пеме хăнăхтарас ĕçе Эдуард Васильевич, хăй те ку енĕпе республикăра сумлă ята тивĕçнĕскер, çỹллĕ шайра йĕркелесе пырать.
Палăртмалла, Хĕрлĕ Чутай шкулĕн салтак çулне çитмен çамрăкĕсем тĕл перессипе республика шайĕнче кăна мар, çĕршыври ăмăртусенче те палăраççĕ. Пĕлтĕр вĕсем Рязань хулинче иртнĕ Спартакиадăра пневматикăллă спорт винтовкинчен тăрса персе Раççейри 39 команда хушшинче виççĕмĕш вырăна тухма пултарнă.
А.КАРПОВА.
Источник: "Пирěн пурнăç"