18 марта 2016 г.
Мартăн 16-мĕшĕнче районта Пĕрлехи информаци кунĕ иртрĕ. Информаци кунне ирттерме района ЧР Тĕрĕслевпе шутлав палатин председателĕ Татьяна Минина, ЧР Патшалăх Канашĕн депутачĕ, Чăвашпотребсоюз Канашĕн председателĕ Валерий Павлов, Наци телерадиокомпанийĕн директорĕ Александр Магарин, Раççей Минюсчĕн Чăваш Республикинчи управленийĕн начальник çумĕ Анатолий Грицай, ЧР Пуçлăхĕн Канашçи Станислав Кондратьев килсе çитнĕ. Ятарлă графикпа килĕшỹллĕн информаци ушкăнĕсем районти пур ял тăрăхне те çитнĕ, халăхпа тĕл пулса Пĕрлехи информаци кунĕн темисене сỹтсе явнă. Татьяна Мининапа район администрацийĕн пуçлăхĕ Александр Башкиров ертсе пыракан ушкăн Кив Атикасси ял тăрăхĕнче пулнă. Татьяна Дмитриевна пухăннисене Чăваш Республикин 2015 çулхи социаллă пурнăçĕпе экономика аталанăвĕ çинчен каласа панă, кăçал тумалли ĕçсемпе паллаштарнă. Пĕлтĕр пирĕн республикăн макроэкономикăн йывăр условийĕсенче аталанма тивнине, çакă экономикăн хăш-пĕр секторĕсен ĕçне вăрахлатнине палăртнă, çав хушăрах шалти ресурссене аталанма майсем пулнине каланă. Хальхи вăхăтра республикăра 180 яхăн пысăк тухăçлă тата социаллă пĕлтерĕшлĕ инвестици проекчĕсем пурнăçланаççĕ. Паянхи куна çивĕч тăракан ыйтусенчен пĕри - çуракине хатĕрленсе ăна тивĕçлĕ шайра ирттересси. Çакăн пирки калаçнă май Александр Башкиров кăçал пирĕн районта çурхи культурăсене пурĕ 4765,5 гектар çинче акса хăварма палăртнине пĕлтернĕ. Хальлĕхе усă курман çĕрсем пур-ха, пурĕ 5096 гектар. Пĕлтĕр 2087 гектар çĕре пусă çаврăнăшне кĕртнĕ, кăçал акмалли çĕрсен лаптăкне 1515 гектар таран пысăклатасшăн. Александр Викторович çавăн пекех çуркунне тавралăха тирпей-илем кĕртессипе çыхăннă ыйту çинче чарăнса тăнă, районта ку тĕлĕшпе çулсерен тасалăхпа санитари уйăхлăхĕ иртнине пĕлтернĕ, пурне те тирпей-илем ыйтăвне пысăк тимлĕх уйăрма, субботниксене хутшăнма чĕнсе каланă. Юлашкинчен информушкăнсем райадминистрацин Пĕчĕк залĕнче пухăнса Пĕрлехи информаци кунне пĕтĕмлетнĕ. А.КАРПОВА.
Источник: "Пирěн пурнăç"