23 марта 2016 г.
Пысăках мар тăхтав хыççăн Чăваш телекуравне "Пирĕн республика. Тĕп тема" программа таврăнать. Асăннă программăн кăларăмне ыран, мартăн 24-мĕшĕнче, "Россия-1" каналăн регионти эфирĕнче 9 сехет те 30 минутра, Наци телевиденийĕпе 20 сехет те 40 минутра, çавăн пекех мартăн 25-мĕ-шĕнче "Россия-24" каналăн регионти эфирĕнче 18 сехет те 30 минутра курма пулĕ. Аса илтеретпĕр, "Пирĕн республика.
Тĕп тема" проект - "Чăваш Ен" ПТРК, Чăваш Ен наци телерадиокомпанийĕ тата "Советская Чувашия" хаçат пĕрле хатĕрленĕ медиа-проект. Ку хутĕнче çурт-йĕр строительствин пахалăхĕпе хăвăртлăхĕ пирки сăмах пырĕ. Телекуравçăсем Шупашкарти "Радужный" микрорайонта тата "Çĕнĕ хула" районĕнче пулса курĕç, Çĕнĕ Шупашкарти нумай хутлă çуртра энергоресурссен тĕрĕслевпе учечĕн "Ăслă çурт" автоматикăллă телеметри тытăмĕ епле ĕçленипе паллашĕç. Çавăн пекех Элĕк районĕнче пурăнакан, кивĕ те авариллĕ çуртсенчен куçнă çынсем патĕнче хăнара пулĕç. Ку отрасль йывăрлăхĕсемпе малашлăхĕ пирки республика Пуçлăхĕпе Михаил Игнатьев- па Леонид Никитин ирттернĕ калаçура паллашма май пулĕ.
Н.ПЕТРОВА.
Источник: "Пирěн пурнăç"