30 марта 2016 г.
Штанаш ял тăрăхĕнче çуралса ỹснĕ, хальхи вăхăтра И.Я.Яковлев ячĕпе хисепленекен Чăваш патшалăх педагогика университечĕн музыкăпа ỹнер факультетĕнче вĕренекен 17 çулхи Наталья Соловьева мартăн 26-мĕшĕнче Шупашкарта иртнĕ "Кĕмĕл сасă - 2016" фестиваль-конкурса хутшăнса Гран-прие тивĕçнĕ.
Чăваш наци конгресĕ республикăри тĕрлĕ министерствăсем пулăшнипе йĕркеленĕ, çĕршывăн тĕрлĕ кĕтесĕнче пурăнакан чăваш юрăçисене пĕр çĕре пухнă конкурс филармони залĕнче иртнĕ. Пурĕ 12 регионти чăваш çамрăкĕ сумлă жюри умĕнче хăйсен ăсталăхне кăтартса панă. Палăртма питĕ кăмăллă, конкурса хутшăннă 35 юрăç хушшинче пирĕн район пики Наталья Соловьева "Шурă Атăл" юрра питĕ илемлĕн шăрантарса Гран-прие тата ЧНК Президенчĕн парнине - тухьяна - тивĕçнĕ. Çавăн пекех ăна планшет тата Крыма кайма путевка парнеленĕ.
Пирĕн районăн маттур пикине сумлă конкурсра çĕнтернĕ ятпа ЧР культура министрĕн çумĕ Вячеслав Оринов, ЧНК Президенчĕн пĕрремĕш çумĕ, ЧР культурăн тава тивĕçлĕ ĕçченĕ Валерий Клементьев, ЧНК Президенчĕ Николай Угаслов саламланă. Аса илтеретпĕр, 2015 çулхи çуркунне Наталья Соловьева районта иртнĕ "Чутай Нарспийĕ" конкурса хутшăнса "Çепĕç Нарспи" номинацире палăрнăччĕ. Ун чухне Валерий Клементьев, жюри йышĕнче пулнăскер, Наташăн çепĕç те уçă сассине тỹрех асăрхарĕ, хĕре "Кĕмĕл сасă" фестивале хутшăнма йыхрав хучĕ пачĕ.
Çакна та каласа хăвармалла, Чăваш наци конгресĕн Хĕрлĕ Чутайри уйрăмĕн хастарĕсем те "Кĕмĕл сасă" конкурсра хамăр район хĕрĕшĕн "çуннă", ăна чунтанах хавхалантарнă. Куракансемпе хăнасем "Кĕмĕл сасă - 2016" фестиваль çỹллĕ шайра иртнине, чăваш эстрада юррин пуласлăхĕ лайăххине, çамрăксенче пысăк шанăç пуррине палăртнă.
А.КАРПОВА.
Источник: "Пирěн пурнăç"