30 марта 2016 г.
Районта "Çулталăк воспитателĕ", "Çулталăк учителĕ" тата "Чи лайăх класс ертỹçи" професси ăсталăхĕн конкурсĕсене ирттересси йăлана кĕчĕ. Кăçал асăннă конкурссен муниципаллă тапхăрĕсене пилĕк воспитатель, ултă педагог тата 11 класс ертỹçи хутшăннă. Мартăн 25-мĕшĕнче районти чи пултаруллă, вĕренỹри инноваци мелĕсемпе усă курса ĕçлекен педагогсене чысларĕç. Республикăра çулсерен иртекен "Çулталăк учителĕ", "Çулталăк воспитателĕ" тата "Чи лайăх класс ертỹçи" конкурссен районти тапхăрĕн çĕнтерỹçисене чыслассипе çыхăннă уяв Хĕрлĕ Чутай шкулĕнче иртрĕ. Уява пухăннисене Ачасен искусство шкулĕнче, Хĕрлĕ Чутайри вăтам шкулта вĕренекенсем, "Пилеш" ача садне çỹрекенсем юрă-ташăпа савăнтарчĕç.
"Çулталăк учителĕ-2016" хисеплĕ ята Çĕн Атикасси шкулĕнче истори предметне вĕрентекен Мария Лихутина тивĕçрĕ. Иккĕмĕш вырăна Хĕрлĕ Чутай шкулĕнче вырăс чĕлхипе литература предмечĕсене вĕрентекен Светлана Яруськина тухрĕ, виççĕмĕшне - Питĕркасси шкулĕнче пуçламăш классене вĕрентекен Алена Галкина.
Шкул çулне çитменнисемпе ĕçлекен педагогсен конкурсĕнче "Çулталăк воспитателĕ - 2016" хисеплĕ ята "Хĕвел" ача садĕнче тăрăшакан Оксана Андрианова тивĕçрĕ. Иккĕмĕш вырăна та çав ача садĕнчех ĕçлекен Юлия Матвеева тухрĕ, виççĕмĕшне - "Пилеш" ача садĕнчи Надежда Гусельщикова.
Класс ертỹçисен конкурсĕнче районти тăхăр вĕренỹ учрежденийĕнчи пĕр класпа икĕ çултан кая мар ĕçленĕ 11 педагог хутшăннă. "Чи лайăх класс ертỹçи" хисеплĕ ята Хĕрлĕ Чутай шкулĕнчи 6 Б класс ертỹçи Светлана Колендрейкина тивĕçрĕ. Иккĕмĕш вырăна Питĕр-касси шкулĕнчи 3-мĕш класс ертỹçи Лариса Абакумова тухрĕ, виççĕмĕш вырăна Атнар шкулĕнчи 2-мĕш класс ертỹçи Тамара Кочеганова тата Мишеркасси шкулĕн-чи 6-мĕш класс ертỹçи Светлана Храмова пайларĕç. Район шайĕнче çĕнтернĕ педагогсем республикăра иртекен конкурссене хутшăнĕç.
А.ВАСЮКОВА.
Источник: "Пирěн пурнăç"