01 апреля 2016 г.
Нумаях пулмасть Шупашкарти Чăваш наци библиотекинче республикăри таврапĕлỹçĕсен XII съезчĕ иртрĕ. Унта районти таврапĕлỹçĕсем те хутшăнчĕç. Чи малтанах республикăри краеведсен пĕрлешĕвĕн председателĕ Виталий Станьял тухса калаçрĕ. Çавăн пекех унта пухăннисем иртнĕ тапхăрти ĕçсене пĕтĕмлетрĕç, пĕрлешĕвĕн çĕнĕ йышне суйларĕç тата пултаруллă таврапĕлỹçĕсене чысларĕç. Вĕсен шутĕнче пирĕн районтан - Лев Медведев, Александр Трофимов, Николай Полозин тата Галина Зотова.
Палăртма кăмăллă, "Халăх академикĕ" ята тивĕçнĕ 10 таврапĕлỹçĕрен пĕри Мăн Этменти пĕтĕмĕшле пĕлỹ паракан вăтам шкулта истори вĕрентекен Николай Полозин пулчĕ. Николай Иванович - чăннипех пултаруллă педагог. Район историйĕпе, халăха çутта кăларас ĕç аталанăвĕпе, педагогсен пурнăçĕпе, ĕç-хĕлĕпе кăсăкланать. Хальхи вăхăтра вăл районти халăха вĕрентес ĕçре вăй хуракансем çинчен материал-сем пухать. Вĕрентỹпе çутĕç çыннисене халалланă кĕнекене педагогсен августри конференцийĕ тĕлне кăларма хатĕрленет.
В.РОМАНОВ.
Источник: "Пирěн пурнăç"