01 апреля 2016 г.
Хальхи вăхăтра сĕт хакĕ хăвăрт чакса ларни ял халăхне самай пăшăрхантарать. "Капла пулсан çулла вăл миçе тенкĕне çитĕ-ши? Пĕр литр сĕт лимонадран та йỹнĕ, мĕнле япала ку? Лавккара çеç сĕт хакĕ чакмасть", - хумханса пĕлтереççĕ район çыннисем.
Хумханма сăлтавĕ те пур çав. Мĕншĕн тесен сĕт сутса укçа тăвасси чылай çемьешĕн тупăш илмелли пĕртен-пĕр çăлкуç пулса тăрать. Республикăри районсенче сĕте халăхран миçе тенкĕпе пухнине пĕлес тесе ЧР Ялхуçалăх министерствинче мартăн 25-мĕшĕ тĕлне пухнă информаципе паллашрăм. Тĕпрен илсен республикăри 16 районта сĕт хакĕ пĕр литршăн 15-17 тенкĕпе танлашать. Сведенисенчен чи пысăк хак Сĕнтĕрвăрри районĕнче пулнине, литрне 20 тенкĕпе пухнине пĕлтĕм. Элĕк, Патăрьел, Комсомольски, Шупашкар районĕсенче сĕт хакĕ 15 тенкĕрен пуçласа 18-19 тенкĕпе танлашать. Министерствăра çынсем сĕт хакĕ чакнипе кăмăлсăр пулнине пĕлеççĕ, анчах нимĕнпе те пулăшма пултараймаççĕ, рынок условийĕсем çапла тума хистенине палăртаççĕ. Иртнĕ çул сĕт хакĕсене йĕркелес шутпа сĕт паракансемпе пухакансене килĕшỹ туса ĕçлеме сĕннĕччĕ. Анчах ĕç тухмарĕ пулас.
Кăçал район çыннисем февраль уйăхĕнче сĕте 23 тенкĕ пе те парса курчĕç. Анчах вĕсен савăнăçĕ нумая пымарĕ. Пĕр-ик эрнеренех сĕт хакĕ тăрук 15 тенке çитсе ларчĕ, халĕ те районĕпех сĕте çак хакпах пуçтараççĕ. "Хак хăпартнă чух пуспа хăпартаççĕ, чакарас-тăк - тенкĕпе", - пăшăрханса калаçаççĕ ял çыннисем. Сĕт пуçтаракан йышлипе конкуренци пулмалла пек. Анчах та пурин те пĕр хак - 15-тенкĕ. Красноармейски, Муркаш, Вăрмар, Çĕмĕрле районĕ-сем пирки те çавнах каламалла. Çакă чĕртавар пухакансем пĕр-пĕринпе канашласа ĕçленине çирĕплетмест-ши?
А.ЗАМУТКИНА.
Источник: "Пирěн пурнăç"