08 апреля 2016 г.
Хĕрлĕ Чутай райповĕн тытăмне кĕрекен "Четайское" тулли мар яваплă обществăн çăкăрпа кулач, кĕлентĕр, кондитер изделийĕсем хатĕрлекен предприятие çынсем халĕ те йăлана кĕнĕ тăрăх çăкăр завочĕ теççĕ. Нумаях пулмасть манăн унта пулса курма тỹр килчĕ.
Çăкăр завочĕн коллективĕ пĕчĕкех мар, производствăра кăна 30 яхăн çын тăрăшать, вĕсенчен 12-шĕ - кондитерсем. Паян сире вĕсенчен пĕринпе, Елизавета Николаевна Ангусеевапа, паллаштарас тетĕп. Вăл Ачкасси ялĕнче çуралса ỹснĕ,шкул хыççăн ытти çамрăк пекех, Шупашкара çул тытнă, повар-кондитера вĕренсе тухнă. Туктамăш каччипе пĕрлешсе çемье çавăрнă, хĕрпе ывăл ỹстерсе пурнăç çулĕ çине кăларнă.
Малтанхи çулсенче тĕрлĕ çĕрте ĕçленĕ, вăл шутра Кив центрти кафетеринче, "Урожай" колхозра. 1997 çултанпа вара çăкăр заводĕнче вăй хурать. 20 çула яхăн тỹрĕ кăмăлпа тăрăшса ĕçленĕ хушăра Елизавета Николаевна хăйне чăн-чăн профессионал пек кăтартса панă. Ун пирки ĕçтешĕсем лайăххине кăна калама пултарчĕç.
Сăмах май, хальхи вăхăтра çăкăр завочĕн кондитер цехĕ 40 ытла издели хатĕрлет. Продукцие вара районти лавккасенче кăна мар, республика тулашĕнче те хаваспах туянаççĕ.
А.ДМИТРИЕВА.