08 апреля 2016 г.
Апрелĕн 2-мĕшĕнче "Хастар" ФСК-ра Чăваш Республикин патшалăх власть тата вырăнти хăйтытăмлăх органĕсенче ĕçлекенсен 15-мĕш Спартакиадин çуркуннехи тапхăрĕн зонăри ăмăртăвĕсем иртнĕ. Унта Хĕрлĕ Чутай, Элĕк, Красноармейски, Муркаш, Пăрачкав, Çĕмĕрле, Етĕрне районĕсенчи тата Çĕмĕрлепе Улатăр хулисенчи администрацисенче ĕçлекенсем баскетболла, сĕтелçи теннисла, шашкăлла тата шахматла вылянă.
Баскетболла выляс енĕпе Пăрачкав районĕн администрацийĕнче ĕçлекенсене çитекенни пулман. Иккĕмĕш вырăна хĕрлĕчутайсем тухнă, виççĕмĕшне - Улатăр хулин администраци ĕçченĕсем.
Теннисла пуринчен те маттур Элĕк район администрацийĕн ĕçченĕсем вылянă, хĕрлĕчутайсем каллех иккĕмĕш тухнă, етĕрнесем - виççĕмĕш.
Шашкăлла выляссипе хĕрлĕчутайсем палăрнă, пурне те çĕнтерме пултарнă, иккĕмĕш вырăна етĕрнесем тухнă, виççĕмĕшне - Красноармейски район администрацийĕн ĕçченĕсем.
Шахматла пуринчен те аван Хĕрлĕ Чутай район администрацийĕн финанс пайĕн специалист эксперчĕ Валерий Самышкин вылянă, пĕрремĕш вырăн йышăннă. Иккĕмĕш вырăна Çĕмĕрле районĕнчи Дмитрий Шипеев йышăннă, виççмĕшне - Элĕк районĕнчи Зиновий Федоров.
Спартакиадăра 1-2-мĕш вырăнсене йышăннисем финалти тупăшусене хутшăнĕç. Ăмăртусем апрелĕн 23-мĕшĕнче хăнасене яланах хапăл туса кĕтсе илекен "Хастар" физкультурăпа спорт комплексĕнче иртĕç.
А.ТИМОФЕЕВА.