13 апреля 2016 г.
Апрелĕн 5-6-мĕшĕсенче Çĕнĕ Шупашкар хулинче çуллахи полиатлон (тăватă енлĕ кĕрешỹсем) енĕпе Чăваш Республикин чемпионачĕ иртнĕ. Ăмăртусене Хĕрлĕ Чутай шкулĕн кадет класĕнче вĕренекен Алексей Дадюков, Юрий Степанов, Константин Секайкин, Юрий Яндайкин, Иван Пименов, Евгения Герасимова тата 11-мĕш класра вĕренекен Кирилл Андрианов хутшăннă (тренерĕ - Эдуард Романов). Республикăри чи лайăх полиатлонистсене пухнă ăмăртусенче хĕрлĕчутайсем çухалса кайман, пачах урăхла, 60 тата 2000 метра чупса, винтовкăран персе тата 100 метра ишсе лайăх кăтартусемпе савăнтарнă, çапла майпа 16-17 çулхи çамрăксенчен тăракан команда республика шайĕнчи ăмăртура çĕнтернĕ. Харпăр хăй зачетĕнче 1999-2000 çулсенче çуралнă яшсем хушшинче Кирилл Андрианов республика чемпионĕн ятне тивĕçнĕ, çав хушăрах спорт мастерĕн кандидачĕн нормативĕсене пурнăçланă. Алексей Дадюков иккĕмĕш вырăна тухнă. Асăннă ỹсĕмри хĕрсем хушшинче Евгения Герасимова кĕмĕл медаль çĕнсе илме пултарнă.
А.КАРПОВА.
Источник: "Пирěн пурнăç"