13 апреля 2016 г.
Апрелĕн 9-мĕшĕнче "Свобода" колхозра иртнĕ çулхи ĕç кăтартăвĕсемпе отчетпа суйлав пухăвĕ пулнă. Колхоз членĕ-сем малашне те ертỹçĕ пулма Валерьян Федотович Бромбинах шаннă.
"Свобода" колхозра яланах ĕç вĕресе тăрать. Çуркунне çитнĕ май пушшех те... 22-мĕш çул ĕнтĕ колхоз тилхепине Валерьян Бромбин çирĕп тытать, колхоз тыр-пул ỹстерет, выльăх-чĕрлĕх ĕрчетет. Хуçалăхăн ялхуçалăх çĕрĕсем 483 гектарпа танлашаççĕ, вăл шутра 362 гектар пусă. Иртнĕ çул колхоз уй-хиртен пĕрчĕллĕ тата пăрçа йышши культурăсене 915 тонна (пĕр гектартан 25,3 центнер) пухса кĕртнĕ. Колхоз фермисенче 300 ытла выльăх, вăл шутра ĕнесем - 100 пуç. Производство ĕçĕн пĕтĕмлетĕвĕсемпе мăйракаллă шултра выльăх шутне упраса хăварнă, аш-какай, сĕт туса илесси те, малтанхи çулпа танлаштарсан, ỹснĕ. Ĕç планĕ те паллă, çу кунĕсенче 200 тонна утă-улăм, 900 тонна сенаж хатĕр-лемелле, 500 ытла тонна сĕт суса илмелле, выльăхсене талăкне пĕр килограма яхăн ỹт хуштармалла...
Çулталăк пĕтĕмлетĕвĕсемпе колхоз пилĕк миллиона яхăн тенкĕ тупăш илнĕ. Тупăш тени ытларах сĕтрен кĕрет. Çавăнпа колхозшăн продуктивлăха, сăвăма ỹстересси, ĕне йышне хушасси тĕп вырăнта. Анчах та сĕт, аш-какай хакĕ йỹнелни тата икĕ-виçĕ çул каялла ферма тума палăртнине пурнăçа кĕртес тĕлĕшре чăрмавсем тухса тăни пăшăрхантарать. Валерьян Бромбин шучĕпе темле пулсан та производствăна сармалли çул-йĕр тупмаллах, пĕр вырăнта тăпăртатса тăнипе ĕç тухмасть. Выльăх-чĕрлĕх усрама çĕр çите- лĕклĕ вĕсен, çынсен çĕр пайĕсене арендăна илнине кура лаптăк икĕ хут ỹснĕ. Ĕçе тивĕçлĕ, кал-кал йĕркелесе пынине кура колхоз çураки тĕлне пĕтĕмпех хатĕрленсе çитнĕ. Коллектив тăрăшуллă, вăл шутра çамрăксем те...
Сăмах май, иккĕмĕш çул ĕнтĕ колхозра агрономра кỹршĕ район çамрăкĕ Павел Айдак вăй хурать. Çуракине епле ирттерессине тĕплĕ палăртса хунă. Иртнĕ çул колхоз кĕрхи культурăсене 220 гектар çинче акса хăварнă, çурхисем вара 320 гектар йышăнмалла. Вăрлăха кĕркуннех сортласа типĕтнĕ. Кондицие лартнă, çуркунне тепĕр хут тĕрĕслеттернĕ. Агроном кĕлетри вăрлăх пахалăхне - типĕ-и, кăшлакан хурт-кăпшанкăсем тапăнман-и - куллен пăхсах тăрать. Акма 95 тонна янтласа хунă, вăрлăхĕ саппаслăх та пур. Акана колхоз икĕ сеялка, 3-4 трактор кăларасшăн. А.ДМИТРИЕВА.
Источник: "Пирěн пурнăç"