13 апреля 2016 г.
Пĕлтĕрхи октябрь уйăхĕнче Çĕмĕрле хулинче кадет класĕсемпе çарпа патриотизм пĕрлешĕвĕсен смотр-конкурсĕ иртнĕччĕ. Чăваш Енрен тухнă офицерсен "Тăван çĕршыв ывăлĕсем" обществăлла организаци пуçарнипе йĕркеленĕ "Çĕнтерỹ салючĕ" конкурса Хĕрлĕ Чутай шкулĕн кадечĕсем те хутшăннăччĕ. Хăйсене лайăх енчен кăтартса парса вĕсем республикăри Çĕнтерỹçĕн кубокне тата Мускавра иртекен çĕршыв шайĕнчи конкурса хутшăнмалли ирĕке тивĕçнĕччĕ. Хĕлĕпех кĕтрĕç 10-мĕш кадет класĕнчи яшсемпе хĕрсем Мускава каймалли йыхрав хучĕ килессе. Çуркуннехи каникул вăхăтĕнче савăнăçлă хыпара кĕтсе илчĕçех.
Апрелĕн 15-мĕшĕнче вĕсем Мускава тухса кайĕç. Апрелĕн 16-мĕшĕнче вара "Марш - çĕнтерỹçĕсене!" стройпа юрă смотрне хутшăнса стройпа утма пĕлнине кăтартса парĕç, Калашников автоматне сỹтсе пухĕç, бал ташшине ташлĕç. Унтан кадетсем çĕршывăн тĕп хулинче экскурсире пулса курĕç. Хальхи вăхăтра Эдуард Романов педагог ертсе пынипе "Авангард" кадет класĕнче вĕренекенсем çине тăрсах çĕршыв шайĕнчи ăмăртăва хатĕрленеççĕ. Аса илтеретпĕр, пирĕн кадетсем 2013 çулхи декабрь уйăхĕнче (ун чухне вĕсем 8-мĕш класра вĕренетчĕç) Мускаври смотр-конкурса хутшăнса çĕнтерỹпе таврăннăччĕ. Хальхинче те кадетсене хăйсене лайăх енчен çеç кăтартса парса çĕнтерỹпе таврăнма ăнăçу сунатпăр. А.КАРПОВА.
Источник: "Пирěн пурнăç"