15 апреля 2016 г.
Апрелĕн 12-мĕшĕнче районти Культура çуртĕнче "Çуралнă çĕршывшăн чĕремĕр юрлать!" ятпа чаплă гала-концерт иртрĕ. Ăна кăçал Раççейри Кино тата Чăваш Енри Ĕç çыннин çулталăкĕсене, "Катюша" батарейин пĕрремĕш ракетчикĕсем, пирĕн ентешсем Алексей Захаров, Иван Коннов, Степан Плисов çуралнăранпа 100 çул çитнине халалланă. Ял тăрăхĕсен йăлана кĕнĕ смотр-отчечĕсем вăхăтĕнче пултарулăх ушкăнĕсен чи лайăх номерĕсене суйласа илнĕ, шăпах çавсене курма халăх питĕ йышлă пухăнчĕ - Культура çуртĕнче ларма мар, тăма та вырăн çукчĕ. Кун пекки тахçанах пулманччĕ.
Пирĕн районти культура пайĕпе культура ĕçченĕсен пысăк ĕçĕ курăнчĕ гала-концертра. Ялсенче сцена çине тухма ỹркенмен ăстасем нумайланса пыни те палăрчĕ. Ытти çулсенчи пекех Пантьăк тата Штанаш ял тăрăхĕ-сенчи фольклор ушкăнĕсем асра юлчĕç. Пантьăксен коллективĕнче çын шучĕ çултан-çул ỹссех пырать, ыттисемпе танах ял тăрăхĕн пуçлăхĕ те сцена çине тухса ташлани те савăнтарать. Атнарсен халăх хорĕ те йышлă, кунта учительсем сцена çине тухса çитĕнекен ăрăва ырă тĕслĕх кăтартаççĕ. Пуян концерт программи куракансен кăмăлне кайни вĕсем кашни номер хыççăн тăвăллăн алă çупнинчен сисĕнчĕ.
Палăртса хăвармалла, хĕрлĕчутайсен ташлас-юрлас пултарулăхĕ çултан-çул ỹссех, çирĕпленсех пырать. Ахальтен мар пулĕ кăçал гала-концерта икĕ пайлă ирттерме йышăннă. Пĕрремĕш пайĕнче ытларах аслисене курма пулчĕ. Иккĕмĕш пайĕ вара апрелĕн 19-мĕшĕнче пулĕ. Унта ытларах ачасемпе çамрăксен пултарулăхне курса савăнăпăр.
А.КАРПОВА.
Источник: "Пирěн пурнăç"