15 апреля 2016 г.
Спортсмен пулмасан та пултаратăн, анчах сывă пулма тивĕç Чăваш Енре спортăн массăллă тĕсĕсемпе çур миллиона яхăн çын туслă - республикăра пурăнакансен 40: патнеллех. Çав вăхăтрах ялсемпе хуласенче физкультурăпа сывлăх комплексĕсен, хоккей курупкисен, бассейнсен шучĕ çуллен ỹссе пырать. Чăваш Ен Пуçлăхĕ Михаил Игнатьев, Патшалăх Канашĕн вице-спикерĕ, "Единая Россия" партин Чăваш регион уйрăмĕн секретарĕ Николай Малов тата Шупашкар хулин пуçлăхĕ Леонид Черкесов тĕп хулари "Спартак" физкультурăпа сывлăх комплексĕпе паллашрĕç. Унпа кăна та мар...
Волейболтан пуçласа аэробика таран
ФОКа 2013 çулхи декабрьте Пĕтĕм Раççейри "Единая Россия" партин социаллă проектне тата республикăн 2010-2020 çулсенче физкультурăпа спорта аталантармалли тĕллевлĕ программине пурнăçланă май хута янă. Объект - нумай функциллĕскер, темиçе зал ĕçлет. Смета хакĕ - 172 млн тенкĕ ытла. Профессионалсем те ăсталăха туптаççĕ, "Ĕçлеме тата хỹтĕлеме хатĕр" нормăна пурнăçлама хатĕрленекенсем те çỹреççĕ. Шкул ачисен тĕллевĕ пĕрре - чи лайăххи пуласси. Саша Ефимовпа Женя Иванов урайĕнчен 25 тата 27 хут тĕртĕнме пултарчĕç - хăнасем вĕсене аллисене чăмăртасах тав турĕç. Чăваш Енĕн пĕрлештернĕ волейбол командин тренерĕн Андрей Страховăн тĕллевĕ вара пысăкрах та анлăрах. 61-мĕш шкулта тинех спорт класне уçнă - талантлă ачасене тупса палăртма май пур. Унăн вĕренекенĕсенчен пĕрне Анастасия Зварыгинана Раççей командине илмелли кандидатсен шутне кĕртнĕ ĕнтĕ. Михаил Игнатьев ăна тĕп йышра çирĕпленме сунчĕ. "Спартакра" икĕ бассейн. Пĕри - тин çеç ишме вĕренекен ачасем валли. Тепринпе çитĕннисем усă кураççĕ - "хăвăрт" çеккунтсемшĕн çунакансем те, сывлăха çирĕплетес тĕллевпе васкамасăр ишекенсем те. Тренажер залĕ те яланах тулли. Чылайăшĕн тĕртĕмĕсем - пăхса ăмсанмалла. Хăшĕсем вара кунта çĕкленỹллĕ кăмăл-туйăмшăн килеççĕ. Хăнасем спорт аэробикин тата воркаут занятийĕн площадкинче те пулчĕç. Республикăри çамрăксем паян спортăн çĕнĕ тĕсĕсене ытларах та ытларах килĕштереççĕ, кайтинг, фристайл, пăр çинчи авточупу... Çамрăксем хăйсен вăйне тĕрĕслеççĕ, çĕнĕ рекордсемпе палăрма ĕмĕтленеççĕ.
Михаил ИГНАТЬЕВ, Чăваш Ен Пуçлăхĕ:
- "Спартак" ФОКа тата "Олимпийский" стадиона Раççей Футбол федерацийĕ 2018 çулта пирĕн çĕршывра ирттерме палăртнă тĕнче футбол чемпионачĕ валли суйласа илнĕ. Çитес çулах Шупашкара тĕнчери футбол командисем тренировкăсене килме пуçлĕç. 2016 çулта Рио-де-Жанейрăра иртмелли çуллахи Олимп тата Паралимп вăййисене хутшăнмалли кандидатсен списокĕнче - Чăваш Енĕн 34 спортсменĕ. Пĕтĕмпе вара Раççейĕн пĕрлештернĕ командисен йышне пирĕн республикăн 150 спортсменне кĕртнĕ. Спорт отраслĕ юлашки 5 çулта малалла пысăк утăм турĕ. 50 спорт объекчĕ тунă тата реконструкциленĕ. Çак ĕçе 6 млрд тенкĕ ытла хывнă. Çурри - федераци бюджечĕн укçи. Район центрĕсенче универсаллă спорт комплексĕсене хута янă, пăр керменĕ-сем, бассейнсем çĕкленеççĕ. Олимп резервĕсен ятарлă чылай шкулне реконструкциленĕ. Шупашкарта "Шупашкар-Арена" пăр керменĕ уçăлчĕ - 7,5 пин куракана йышăнма пултарать. Ăна тата пысăк ытти спорт сооруженине Пĕтĕм Раççейри спорт объекчĕсен реестрне кĕртнĕ. Чăваш Енре çуллен официаллă 350 ăмăрту иртет. Вĕсенчен 60-шĕ - пĕтĕм Раççей шайĕнчисем. Пĕрререн кая мар - тĕнче шайĕнчи.
Спорт объекчĕсем - малашлăх инвестицисем
"Единая Россия" парти пуçарнипе паян ялсенчи спорт залĕсемпе стадионсене çĕнетеççĕ. Николай МАЛОВ, "Единая Рос-сия" партин Чăваш регион уйрăмĕн секретарĕ: - "Единая Россия" партин "Ачасен спорчĕ" проекчĕ пулăшнипе икĕ çулта Чăваш Енри ялсенчи шкулсен 70 спорт залне юсама май килчĕ. Çак ĕç тивĕçлĕ кăтартусемпе савăнтарать. Массăллă физкультура занятийĕсем - патшалăхпа обществăна шăпах çакă кирлĕ. Чăваш Енри ялсене спорт сооруженийĕсемпе тивĕçтернин шайĕ - 60:. Хуласенчи кăтартуран та пысăкрах - унта ку кăтарту 46: ша- йĕнче.
"500 бассейн" - чикĕ мар
Чăваш патшалăх педагогика университечĕн бассейнĕ - препода-вательсемпе студентсен мăнаçлăхĕ. Ирсерен тата каçсерен, çавăн пекех кану кунĕсенче кунта хула çыннисем пурте çỹреме пултараççĕ - вырăн çитет. Бассейн пысăк вĕт _ 26 метр тăршшĕ, 16 метр сарлакăш. ФОК çуртĕнче çавăн пекех тренажер, гимнастика залĕсем те пур. Комплекса 2012 çулхи декабрьте "Единая Россия" партин "500 бассейн" социаллă проектне пурнăçласа хута янă. Кĕçех вара Чăваш патшалăх университечĕн те çĕнĕ йышши çакнашкал çурт пулĕ. Хальхи вăхăтра Шупашкарта федерацин тĕллевлĕ программисемпе харăсах пысăк икĕ спорт объекчĕ тăваççĕ. Кăçалхи октябрь уйăхĕнче Олимп хатĕрленĕвĕн биатлон центрĕ хута каймалла. Виçĕ хутлă çуртра спортсменсене хатĕрлемелли 16 пỹлĕм, çавăн чухлех йĕлтĕрсене старта хатĕрлемелли пỹлĕм, допинг-тĕрĕслев пỹлĕмĕсем, тренажер залĕсем, пресс-центр, медпункт тата ытти вырнаçĕç. Трибунăсем 500 куракана йышăнмалла. Олимп резервĕсен шкулĕн директорĕ Николай Николаев центра уçма паллă биатлонистсем - Раççейĕн пĕрлештернĕ командин йышне кĕртнĕ Павел Магазеев, Татьянăпа Вячеслав Акимовсем - килессе шанать. Тепĕр Олимп объектне _ маунтинбайк центрне - уçма вара тĕнче чемпионачĕн кĕмĕл призерне Ирина Калентьевана тата çамрăксем хушшинче тĕнче ăмăртăвĕнче медале тивĕçнĕ Ольга Терентьевана кĕтеççĕ. Хальлĕхе вара Чăваш Ен Пуçлăхĕ объектпа саккасçăпа тата подрядчикпе пĕрле паллашрĕ. Центрта 5 спорт залĕ, шывра ишмелли 2 бассейн, вĕренỹпе методика центрĕ, 58 вырăнлă хăна çурчĕ пулмалла. Тата - уçă велодром, ункă евĕр трасса. Шупашкарти маунтинбайк центрĕ спортăн çак енĕпе Раççейĕн пĕрлештернĕ командин хатĕрленỹ бази пулĕ.
Леонид ЧЕРКЕСОВ, Шупашкар хулин пуçлăхĕ:
- Шупашкар 500 çул тултарнине хисеплесе ят панă паркра халĕ çĕнĕ йышши тепĕр фитнес-центр строительствине пуçлатпăр. Ăна Мускаври компани хăйĕн укçипе тăвать. Инвестицисен виçи - 80 млн тенкĕ патнелле. Ку - вĕсен Чăваш Ен тĕп хулинчи иккĕмĕш объекчĕ ĕнтĕ. Ĕçтешлĕхе малалла тăсăпăр. Уйрăм çынсем спорта хывакан инвестицисем - пирĕншĕн çĕнĕ тата кăмăллă пулăм. Леонид НИКИТИН.
Источник: "Пирěн пурнăç"