20 апреля 2016 г.
Хĕрлĕ Чутай шкулĕн "Авангард" кадет класĕн 11 яшĕпе 6 хĕрĕ тата вĕсен педагогĕ Эдуард Романов апрелĕн 17-мĕшĕнче Мускавран çĕнтерỹпе таврăнчĕç. Пĕтĕм Раççейри "Марш - Çĕнтерỹçĕсене" смотр-конкурсра Чăваш Республикин чысне хỹтĕленĕскерсем, хăйсем çине илнĕ яваплăха тивĕçлипех пурнăçланă хĕрлĕчутайсем. Мускава кадетсем апрелĕн 15-мĕшĕнче ирпе ирех тухса кайнă. Каçхине çĕршывăн тĕп хулине çитсен вĕсене унта "Сыны Отечества" офицерсен пĕрлешĕвĕн представителĕ Эрик Васильевич Васильев полковник кĕтсе илнĕ, Мускаври пĕрремĕш кадет корпусне вырнаçма пулăшнă.
Тепĕр кунне, апрелĕн 16-мĕшĕнче, "Одиссей" физкультура комплексĕнче Аслă Çĕнтерĕве 71 çул çитнине халалланă смотр-конкурс иртнĕ. 5-мĕш хут иртекен смотр-конкурса Мускаври тата регионсенчи шкулсенчен, çарпа патриотизм клубĕсенчен, кадет кор-пусĕсенчен килсе çитнĕ 30 команда хутшăннă. Смотр-конкурс пĕтĕмлетĕвĕсем çакна кăтартса панă - стройпа утассипе те, Калашников автоматне сỹтсе пухассипе те, Раççейĕн çар историйĕпе çыхăннă ыйтусем çине хуравлассипе те аслисен ушкăнĕнче пирĕн район кадечĕсене çитекенни пулман. Çапла вара хăйсене пур енчен те лайăх кăтартса парса Хĕрлĕ Чутай шкулĕнче 10-мĕш класра вĕренекен кадетсем 1-мĕш вырăна тухнă, Кубока тата Хисеп грамотисене тивĕçнĕ. Смотр-конкурса йĕркелекенсен Хисеп хучĕсене çавăн пекех Эдуард Васильевич Романовпа Ирина Алексеевна Романова педагогсем (ачасене патриотизмла воспитани парас ĕçе пысăк тỹпе хывнăшăн) тата Юрий Степанов кадет (командăна ăста ертсе пынăшăн) тивĕçнĕ.
Сăмах май, асăннă конкурсран иккĕмĕш хут çĕнтерỹпе таврăнчĕç пирĕн кадетсем. 2013 çулта та вĕсем, ун чухне 8-мĕш класра вĕренекенскерсем, пĕрремĕш вырăна тухма пултарнăччĕ. Паллах, кадетсем Раççей шайĕнчи конкурсра ку хутĕнче те çĕнтерме пултарнăшăн питĕ савăннă. Мускава каясси çинчен пĕлсенех кашни кун çине тăрса хатĕрленни, тăрăшни, пăлханни сая кайман-çке. Ытти чухне эпир кадетсене Стас Михопаркин ертсе пынине хăнăхнă-ха, анчах та вăл, пултаруллă пулнăшăн Крыма каймалли путевкăна тивĕçнĕскер, хальхи вăхăтра "Артек" лагерьте канать.
Смотр-конкурс хыççăн кадетсем 1941-1945 çулсенчи Аслă Отечественнăй вăрçăн Тĕп музейĕнче пулса курнă, унти экспонатсемпе паллашнă, Мускав патĕнчи çапăçу пирки каласа панине кăсăклансах итленĕ. Пĕтĕмĕшле илсен, виçĕ куна пынă çулçỹревпе хĕрлĕчутайсем кăмăллă юлнă. Эпир хамăрăн маттур кадетсемпе чăннипех мăнаçланатпăр, вĕсемпе мухтанатпăр. Çав хушăрах çитĕнекен ăрăва тивĕçлипех патриотизмла воспитани парса ỹстерес тесе чунтан тăрăшнăшăн аслисене те - педагогсене, ашшĕ-амăшне - тав сăмахĕ калас килет. Вĕсем пулăшнипе, ăнланнипе ачасен республика тулашĕнчи конкурссене тухса çỹреме, хăйсен пултарулăхне кăтартса пама май пур.
А.ОРИНОВА.
Источник: "Пирěн пурнăç"