20 апреля 2016 г.
Апрелĕн 9-мĕшĕнче районти "Хастар" физкультурăпа спорт комплексĕнче пысăк спорт мероприятийĕ иртнĕ. Унта республикăри суд тытăмĕнче ĕçлекенсем тата судьясем бассейнра 50, 100 тата 300 метр ишес енĕпе тупăшнă. Командăсем хушшинчи ăмăртура Чăваш Республикин Аслă сучĕн ĕçченĕсем мала тухнă. Пирĕн район команди вара тăваттăмĕш пулнă. 46-51 çулхи арçынсем хушшинче 50 метр ишессипе Етĕрнери халăх сучĕн федераллă судйине Юрий Михайлова çитекен пулман. Унăн ĕçтешĕ Олег Иванов асăннă дистанцие иккĕмĕш ишсе тухнă.
Çавăн пекех 25 çула çитмен çамрăксем хушшинче 100 метр ишессипе суд ларăвĕн секретарĕ Андрей Шипеев тата 31-36 çулхи арçынсем хушшинче Алексей Яковлев водитель иккĕмĕш вырăн çĕнсе илнĕ. Ăмăрту хуçисен капитанĕ, алла-аллăн тытăçса кĕрешес енĕпе Раççей спорт мастерĕ Юрий Михайлов 300 метр ишессипе те иккĕмĕш вырăн йышăннă.
Апрелĕн 16-мĕшĕнче Юрий Михайлов федераллă судья ертсе пыракан "Фемида" волейбол команди вара республикăри йĕрке хуралĕнче ĕçлекенсем хушшинче пĕрремĕш пулнă, иккĕмĕш - ЧР Прокуратури, виççĕмĕш - ЧР Аслă сучĕн команди, тăваттăмĕш - ЧР Арбитраж сучĕн команди.
Источник: "Пирěн пурнăç"