22 апреля 2016 г.
Апрелĕн 19-мĕшĕнче районти Культура çуртĕнче "Çуралнă çĕршывшăн чĕремĕр юрлать" гала-концертăн иккĕмĕш пайĕ иртрĕ. Çитĕнекен ăрăвăн пултарулăхĕ иксĕлми, тĕрлĕ енлĕ пулнине тепĕр хут çирĕплетсе пачĕç районти ачасемпе çамрăксем. Вĕсем хушшинче чăвашла тата вырăсла сăвăсене илемлĕ вулакансем те пулчĕç: Хĕрлĕ Чутай шкулĕнче 3-мĕш класра вĕренекенсем, Дмитрий Оринов, "Пилеш" ача садне çỹрекен Софья Гавриловапа Софья Петрова, Атнар ял тăрăхĕнчи Диана Ионова, Хусанушкăнь ял тăрăхĕнчи Софья Швецова, Хĕрлĕ Чутай шкулĕнче вĕренекен Екатерина Эзенкина, Мария Беспалова.
Уçă сассисемпе юрăсем шăрантарса куракансене Атнар шкулĕнчи ачасен хорĕ, Ачасен искусство шкулĕн хорĕ тата ансамблĕ, Татьяна Мурайкина, Анна Сармандейкина, Инна Крыцова, Мария Аливанкина, Кира Булаткина, Диана Майорова, Татьяна Ефремова тыткăнларĕç. Ташă пултарулăхне "Пилеш" тата "Хĕвел" ача сачĕсенчи шкула кайма хатĕрленекенсен ушкăнĕсем, Хусанушкăнь ял тăрăхĕнчи "Çăлкуç" ача сачĕн ушкăнĕ, Хĕрлĕ Чутай шкулĕнче, Ачасен пултарулăх çуртĕнче вĕренекенсем, "Хастар" ФСК-н аэробика уйрăмне çỹрекенсем, Штанаш ял тăрăхĕнчи хĕрсем кăтартса пачĕç.
Çавăн пекех "Пилеш" ача садĕнче ĕçлекенсемпе ачасем кăтартса панă литературăпа музыка композицийĕ, Ачасен пултарулăх çурчĕн "Ачасем тата театр" пĕрлешĕвĕ выляса кăтартни, Пантьăк ял тăрăхĕнчи шкул çулне çитменнисен "Карусель" ушкăнĕн шăпăрланĕсем лартса панă кулăшла сценка асра юлчĕç. Ачасемпе çамрăксен ташши-юррине курса савăнма халăх йышлă пухăнчĕ. Куракансем концертпа кăмăллă юлчĕç, килелле утнă чух та пĕчĕк артистсен пултарулăхĕ пирки калаçрĕç.
А.КАРПОВА.
Источник: "Пирěн пурнăç"