22 апреля 2016 г.
Райпо тытăмне кĕрекен "Янтарь" тулли мар яваплă общество иртнĕ çул çурхи тапхăрта хурăн сĕткенне 11 тонна çурă пухнăччĕ. Кăçалхи апрель уйăхĕн пуçламăшĕнче вара хурăн шывне 15 тонна яхăн пухса сĕткен янтланă.
Ятарлă бригада март уйăхĕн иккĕмĕш çурринчен пуçласа апрель пуçламăшĕнче хурăнсем вулă тăрăх сĕткен хăвалама пуçланипе усă курса тара илнĕ делянкăсем çинчи хурăнсем çинчен ятарлă хутаçсене сĕткен пухнă. "Янтарь" ĕçченĕсем вара сĕткене ала витĕр юхтарнă, пастеризациленĕ, лимон йỹçекĕ, сахăр хушса фильтр витĕр кăларнă, стерилизацилесе 0,31 литр тата 3 литр банкисене тултарса хупнă.
Пылакрах тутăллă хурăн эликсирне халăхра "чĕрĕ шыв" теççĕ. Сĕткен сывлăхшăн усăллă япаласемпе палăрса тăрать. Ахальтен мар Мускавра Чăваш Ен тăратнă пахалăхлă та сывлăхшăн усăллă апат-çимĕç куравĕнче "Наци сывлăхĕ - Раççей аталанăвĕн никĕсĕ" форума хутшăнакансем хĕрлĕчутайсен хурăн сĕткенне лайăх хак панăччĕ.
Сăмах май, "Чăваш биопродукт" тавар паллипе тухакан хурăн сĕткенĕсĕр пуçне халăх "Янтарь" кăларакан консервланă хăярсене, маринадланă томатсене, салатсене те кăмăллать. Производство предприятийĕн продукцийĕсем райпо лавккисенче, Чăвашпотребсоюз суту-илỹ сетĕнче, иртнĕ çултанпа Мускавра, "Центросоюз гастрономĕсенче" сутăнаççĕ. Пĕтĕмпе "Янтарь" 52 тĕрлĕ консервланă продукци, алкогольсĕр напитоксем, улма-çырла сĕткенĕсем хатĕрлесе кăларать. Иртнĕ çул предприятире 59 пин декалитр напиток, 190 туб консервланă продукци янтланă. Продукцин тавар калăпăшĕ 110 процентпа танлашнă, унчченхи çулпа танлаштарсан ỹсĕм шайĕ 116,5 процента çитнĕ.
А.ЗАМУТКИНА.
Источник: "Пирěн пурнăç"