27 апреля 2016 г.
Çуркунне çитсен пурне те çулсем япăхланни, шăтăк-путăкланса кайни калаçтарать. Ку ыйтăва эпир куçран вĕçертместпĕр. Районта асфальтлă çулсем çинчи шăтăк-путăклă вырăнсене саплас ĕçе пуçăнтăмăр та ĕнтĕ, ĕçсене майăн 1-мĕшĕ тĕлне вĕçлеме палăртатпăр.
Пĕтĕмĕшле илсен кăçал районти автоçулсем çинче юсав ĕçĕсем ирттерме 4 миллион ытла тенкĕ уйăрнă. Çак укçапа пирĕн "Хĕрлĕ Чутай-Пчелка" (0,25 км тăршшĕ), "Элĕк-Кив Атикасси-"Сура"-Штанаш-Арайкасси" (0,4 км тăршшĕ) автоçулсене, Хĕрлĕ Чутай салине пырса кĕмелли çула (Ленин урамĕ) юсаса çĕнетмелле, кĕперсене юсамалла тата ытти ĕçсене пурнăçламалла. Унсăр пуçне 10 ял тăрăхĕнчи автоçулсене пăхса тăма, юсаса çĕнетме 7 миллион та 602 пин ытла тенкĕ уйăрнă, çав шутран республика бюджетĕнчен - 2 миллион ытла, вырăнти бюджетран - 5 миллион ытла. Çавăн пекех кăçал районта автомобиль çулĕсем те тума палăртнă, çакна валли пурĕ 10 миллион ытла тенкĕ уйăрнă.
Алексей ИЛЬИН, райадминистрацин строительство, çул-йĕр тата коммуналлă хуçалăх пайĕн начальникĕ.
Источник: "Пирěн пурнăç"