27 апреля 2016 г.
1986 çулхи апрелĕн 26-мĕшĕнче Чернобыльти атомлă электростанцире инкек пулса иртнĕренпе кăçал 30 çул çитрĕ. Асăннă катастрофăна тĕп тунă çĕре Раççей çĕршывĕн чи пĕтĕм регион хутшăннă, вăл шутра чăвашсем те. 1986-1990 çулсенче авари синкерлĕхне сирме Чăваш Республикинчен 1957 çынна янă.
Районти социаллă хỹтлĕх пайĕн ертсе пыракан эксперт специалисчĕ Людмила Тарасова пĕлтернĕ тăрăх, хальхи вăхăтра район территорийĕнче ултă ликвидатор, вăл шутра виçĕ ЧАЭС инваличĕ, пурăнать. Вĕсем: Хĕрлĕ Чутайри Дмитрий Романов, Борис Цветков, Сĕнтĕкçырминчи Дмитрий Варламов, Ачкассинчи Валерий Албаков, Шулюри Юрий Инжебейкин, Кỹпешри Николай Балабанов. Вĕсем пурте 1986-1987 çулсенче Чернобыльти аварие сирме хутшăннă.
Пирĕн районта çуралса ỹснĕ, анчах тĕрлĕ хулара ĕçлесе пурăннă ентешсем те Чернобыльти аварие сирме кайнă. Çакăн пек хастарсенчен пĕри - Михаил Павлов. Вăл хăй вăхăтĕнче Мăн Этменти пĕтĕмĕшле пĕлỹ паракан вăтам шкултан вĕренсе тухнă. Çамрăк чух Чапаев ячĕллĕ заводра ĕçленĕ. Хĕсметре тăнă хыççăн, 1973-1975 çулсенче, Грузинчи Ингури ГЭС-не тунă çĕрте ĕçленĕ. 1975 çулта Чăваш Ене таврăннă та Çĕнĕ Шупашкар ГЭС-не хута янă çĕрте ĕçленĕ. Михаил Родионович 600 ĕç çыннинчен тăракан бригадăна ертсе пынă. 1985 çулта Çĕпĕрте ГЭС хута янă çĕрте ĕçленĕ. Пĕтĕмĕшле ĕç стажĕ унăн 40 çултан та иртет.
1986 çулта Чернобыльте инкек пулсан унта тухса кайнă. Виçĕ уйăх хушши инкеклĕ вырăнта вăй хунă. Хальхи вăхăтра вăл Çĕнĕ Шупашкарти чернобылецсен обществăлла организацине ертсе пырать, малтанах организацинче 488 çын шутланнă. Шел те, вĕсен йышĕ çултан-çул чакса пырать, халĕ сăмахран, вĕсем 246-ăн кăна юлнă, вăл шутра пирĕн районтан тухнисем те пур: Г.Е.Иванов (Пантьăкран), Ю.Н.Митин (Шĕмшешрен), Н.А.Чебуков (Тихăнушкăнчен), М.Р.Павлов (Турхантан), А.А.Семенов (Çĕн Ирчемесрен), П.В.Сидоров (Мишеркассинчен), А.М.Кудряев (Туканашран).
Чернобыль ветеранĕпе эпир хĕрлĕчутайсен ентешлĕх уявĕнче курса калаçрăмăр. Михаил Родионович кăкăр тулли медаль çакнă. Вĕсене вăл çĕршыври паллă пулăмсене хастар хутшăннăшăн, тỹпе хывнăшăн, тăрăшса ĕçленĕшĕн тивĕçнĕ. Михаил Родионович ертсе пыракан организаци паян ытларах аварие сирнĕ çĕрте аманса вилнисен мăшăрĕсене, ачисене пулăшас енĕпе ĕçлет.
Сăмах май, ĕнер Шупашкарта Раççейри катастрофăсенче тата радиациллĕ аварисенче вилнисене асăнса мероприяти иртнĕ. Пирĕн районтан унта 1986 çулта Чернобыльте пулнă Шулюри Юрий Гурьевич Инжебейкин, 3-мĕш ушкăн инваличĕ, хутшăннă.
А.ЗАМУТКИНА.
Источник: "Пирěн пурнăç"