13 мая 2016 г.
Майăн 5-мĕшĕнче районти "Хастар" физкультурăпа спорт комплексĕнче салтак çулне çитмен çамрăксен Спартакиади иртрĕ. Унта пурĕ республикăри хуласемпе районсенчи 15 команда хутшăнчĕ. Район чысне Хĕрлĕ Чутай шкулĕн салтак çулне çитмен çамрăкĕсем хỹтĕлерĕç.
Командăсем тăватă енлĕ ăмăртусенче тупăшрĕç: пневматикăллă винтовкăран пересси, çăмăл атлетика, çар эстафети, çар хатĕрленĕвĕ. Пур ăмăртура та лайăх кăтартусемпе палăрса Хĕрлĕ Чутай шкулĕнчи Эдуард Романов педагог ертсе пыракан команда 1-мĕш вырăн йышăнма пултарчĕ. Иккĕмĕш вырăна етĕрнесем йышăннă, виççĕмĕшне - муркашсем.
Палăртмалла, хĕрлĕчутайсем республика шайĕнчи Спартакиадăра 2010 çултанпа çĕнтереççĕ. Çапла майпа Хĕрлĕ Чутай шкулĕн 10 яшĕ - Артем Романов (ушкăн командирĕ), Кирилл Андрианов (иккĕшĕ те 11-мĕш класра вĕренеççĕ), Алексей Дадюков, Стас Михопаров, Ярослав Зайцев, Юрий Яндайкин, Константин Секайкин, Юрий Степанов, Иван Пименов, Юрий Дмитриев (10-мĕш кадет класĕнче вĕренеççĕ) - çитес вăхăтра Краснодар хулинче иртекен Раççей шайĕнчи Спартакиадăра республика чысне хỹтĕлĕ.
А.КАРПОВА.
Источник: "Пирěн пурнăç"