13 мая 2016 г.
2015 çулхи июлĕн 22-мĕшĕнче тухнă район хаçатĕнче эпир Шуккакасси ялĕ çывăхĕнче хĕр виллине тупни пирки çырса кăтартнăччĕ. Çак усал ĕçе тунă тесе Шупашкарта пурăнакан мăшăра тытса чарнине те пĕлтернĕччĕ. Вĕсем тĕлĕшпе пуçарнă уголовлă ĕçе тишкерсе пĕтернĕ.
РФ Следстви комитечĕн Чăваш Енри управленийĕ пĕлтернĕ тăрăх, 32-ри арçынпа 30 çулти хĕрарăмăн шăпине ЧР Аслă сучĕ татса панă: упăшкине 9 çул та 11 уйăха ирĕкрен хăтарнă, арăмне - 7 çуллăха. Çавăн пекех иккĕшне те тата 1 çул хушса ирĕкрен хăтармалла тунă. Следстви версийĕ тăрăх, 2015 çулхи июль уйăхĕн 13-мĕшĕнче Шупашкар районĕнчи Энтимĕркассинче вĕсем Лапсара ĕçе кайма тухнă çамрăк хĕрарăма машинăна вăйпах лартнă та 100 километр аякка, пирĕн района, илсе килнĕ. Шуккакасси çывăхĕнче чарăннă та посадкăна кĕнĕ. Арçын унччен еркĕнĕ пулнă хĕрарăма çĕçĕпе кĕлеткин тĕрлĕ пайĕнчен 18 хутран кая мар чикнĕ. Арăмĕ вара сумкине ухтарнă, тупăннă 7 пин тенкине кăларса илнĕ. Хĕрарăмăн виллине июль уйăхĕн 19-мĕшĕнче тупнă.
Уголовлă ĕç материалĕсенче палăртнă тăрăх, тискер ĕç тунă арçын 2011 çулта арăмĕнчен уйрăлса çак çамрăк хĕрарăм патне кайнă пулнă. 2014 çулта арçын çемьене таврăннă, анчах арăмĕ килте харкашу тухнине çамрăк хĕрарăмпа çыхăнтарнă, çавăнпа вăл мăшăрне унчченхи еркĕнне вĕлерме хĕтĕртнĕ. "Çынни çук-тăк хуйхи те çук", - тенĕ-ши? Çак уголовлă ĕçпе 20 свидетельтен ыйтса пĕлнĕ, 25 экспертиза ирттернĕ. Судпа психиатри экспертизи, тĕслĕхрен, арăмĕпе упăшки ăслă-тăнлă, хăйсем мĕн тунине ăнланнă тесе палăртнă.
А.САН.
Источник: "Пирěн пурнăç"