18 мая 2016 г.
Депутатсем пирки "халăх тарçисем" тесе ахальтен каламаççĕ пулĕ - çынсене мĕн пăшăрхантарни, вĕсене пулăшас тесен мĕн тумалли пирки шухăшласах тăмалла. Аслисен ыйтăвĕсене татса панă хушăрах çитĕнекен ăру пирки те манмалла мар - шăпах ачасем пирки-çке эпир "пирĕн пуласлăх" тетпĕр.
Хаçат ĕçĕнче тимленĕ май кашни уйăхра пулакан Пĕрлехи информаци кунне хутшăнма, информушкăнсемпе ял тăрăхĕсене тухса çỹреме тивет. ЧР Патшалăх Канашĕн депутачĕ, Чăвашпотребсоюзăн председателĕ Валерий Павлов кĕрекен ушкăнпа, сăмахран, темиçе тĕлпулура та пулнăччĕ. Валерий Михайлович кашни информаци кунĕнчи тĕлпулусенче сỹтсе явать, çынсен пĕр ыйтăвне те хуравсăр хăвармасть. Иртнĕ информаци кунĕнче эпир Мишеркасси ялĕнче пулнăччĕ. Унта Н.Трифонов панă ыйтăва та вăл хурав пама шантарчĕ. Валерий Михайлович кирек хăçан та халăхпа çыхăну тытма, халăха пăшăрхантаракан, хумхантаракан ыйтусене хурав пама тăрăшать, хуравсем халăх патне çитнипе, вĕсем хаçатра пичетленсе тухнипе интересленсех тăрать.
Нихăçан та хăйне мăнкăмăллă тытнине курман. Унăн сăмахĕ сем витĕмлĕ, тарăн, сăмаха шухăшласа калать, ĕçе вĕçне çитерме кăмăллать. Вăл пултаруллă депутат, ертỹçĕ пулнине эпир пĕрре мар курнă, илтнĕ. Кăçал та вăл ертсе пыракан Чăвашпотребсоюз Канашĕ ĕç ăмăртăвĕнче çĕршывра пĕрре-мĕш тухма пултарчĕ.
Валерий Павлов пек ăслă-тăнлă, сăпайлă, маттур çынсем пирĕн района темиçе çул хушши ĕçпе килсе çỹренишĕн, районшăн тăрăшнишĕн район халăхĕн савăнмалла кăна. Ялтан тухсах çỹрейменни, тен, пĕлсех те çитереймест пуль, депутатăн тỹпи район аталанăвĕнче калама çук пысăк. Тепĕр çын хамăр районтан тухнă, пысăк çĕрте ĕçлет пулсан та ун чухлĕ ĕç туса пулăшаймасть. Мĕнпе пулăшать-ха вăл? Паянхи пурнăçра районта стройка е урăх пĕр-пĕр ĕç тăвас пулсан укçа-тенкĕ явăçтарма çăмăл мар. Çак тĕлĕшре шăпах Валерий Павлов депутатăн ĕçĕ пĕлтерĕшлĕ. Хĕрлĕ Чутай шкулĕн пристройне, Хĕрлĕ Чутай салинче нумай хваттерлĕ çуртсем, Кивĕ центрта ача сачĕ тума, райбольницăна çĕнетме, шкулсен спортзалĕсене тĕпрен юсама тата ытти ĕçсене пурнăçлама республикăран укçа явăçтарма пулăшрĕ Валерий Павлов. Кунпах лăпланса лармасть, тăтăшах района килсе ĕçсем мĕнле пурнăçланнине, укçа-тенкĕпе вырăнлă усă курнине тишкерсе, татса памалли ыйтусене пĕлсех тăрать.
Чăваш Республикин Патшалăх Канашĕн депутачĕ Валерий Павлов ыттисемпе танах çитĕнекен ăрăва та тимлĕх уйăрсах тăрать. Районти шкулсене е ача сачĕсене çитсе курнă май нихăçан та пушă алăпа килмест, вĕренекенсене те, вĕрентекенсене те тимлĕх уйăрать. Акă хальхи вĕренỹ çулĕ пуçланнă кун, 2015 çулхи сентябрĕн 1-мĕшĕнче, Валерий Михайлович районти икĕ шкула çитсе ачасемпе тата вĕрентекенсемпе тĕл пулчĕ. Хĕрлĕ Чутай шкулĕнчи пĕрремĕш класа каякан 70 яхăн ачана вăл парнесем пачĕ.
Питĕркасси шкулĕнче вĕренекенсене вара физкультура урокĕсенче кирлĕ пулакан мечĕксем парнелерĕ. Депутат тивĕçĕсене пурнăçланипе пĕрлех Чăвашпотребсоюз ертỹçи те пулнă май Валерий Павлов эмел курăкĕ чылай пухакан шкул ачисене те тимлĕхсĕр хăвармасть, тăтăшах укçа тата хисеп хучĕ парса хавхалантарать. Çакна та палăртса хăвармалла: Валерий Павлов тăрăшнипе районта çулсеренех ыркăмăллăх елки иртет, унта Çĕнĕ çул уявĕ вăхăтĕнче сахал тупăшлă, нумай ачаллă çемьесенчи ачасем савăнаççĕ, парнесене тивĕçеççĕ. Пирĕн депутатсем районти çĕнĕ "Хĕвел" ача садне уçассишĕн те сахал мар тăрăшрĕç, "Единая Россия" партин программипе килĕшỹллĕн шкулсенчи спорт-залсене çĕнетесси мĕнле пурнăçланнипе те кăсăклансах тăчĕç, пулăшрĕç. Ача садне уçнă чухне Валерий Павлов 20 пин тенкĕлĕх сертификат пачĕ, уçăлнă хыççăн та унта ĕçлекенсемпе, ачасемпе тĕл пулать, унти лару-тăрăва куçран вĕçертмест.
Педагогсене те хавхалантарать депутат. Акă вĕрентỹпе воспитани ĕçне йĕркелес тата лайăхлатас ĕçре пысăк ăнăçусем тунăшăн районти пилĕк педагог - Тури Çĕрпỹкасси шкулĕнчи Алевтина Скворцова, "Пилеш" ача садĕнчи Лариса Васькова, Питĕркасси шкулĕнчи Ольга Фондеркина, Ачасен искусство шкулĕн ертỹçи Венера Молодейкина, Штанаш шкулĕнчи Алина Осеева - Учитель кунĕнче ЧР Патшалăх Канашĕн депутачĕн Валерий Павловăн виçĕ пин тенкĕпе танлашакан сертификатне тивĕçрĕ.
Çавăн пекех Валерий Павлов клубсене, ял тăрăхĕсене, тĕрлĕ организацисемпе учрежденисене спонсорла пулăшу парать. Ветерансене, нумай ачаллă çемьесене, çамрăк çемьесене тимлĕх уйăрать. Чылай çынна хăйсене пăшăрхантаракан ыйтăвĕсене район, республика, çĕршыв шайĕнче татса пама пулăшать.
Кĕскен каласан, районта унсăрăн пĕр ĕç те иртмест темелле. Строительство пырать-и, объект уçăлать-и, халăхшăн пĕлтерĕшлĕ ĕçе сỹтсе яваççĕ-и, ĕçле-кенсене чыслаççĕ-и - вăл яланах районта. Халăх суйланă депутатăн çавăн пек пулмалла та ĕнтĕ, халăх ырлăхĕшĕн ĕçлемелле, тăрăшмалла.
А.САН.
Источник: "Пирěн пурнăç"