18 мая 2016 г.
Паянхи кун ялта кадрсен çитменлĕхĕ çивĕч тăрать. Политиксен тата экономистсен шучĕпе, сăлтавĕ кунта - çынсем хулана туртăнни. Кивĕ кадрсем, паллах, паян е ыран каяççĕ, çĕннисем вара çĕр ĕçĕпе, выльăх-чĕрлĕхпе ĕçлесшĕн мар, вĕсене хула илĕртет. Паянхи çамрăксен ытларах офис характерлă шухăш йĕркеленни сисĕнет. Аслă вĕренỹ заведенийĕсенче те ытларах юриста, управленеца, банкира тата ытти престижлă, укçаллă специальноçсене вĕренеççĕ. Ялта вара хĕрупраçпа яш-кĕрĕм ỹсĕм, пуласлăх курмаççĕ. Çитменнине чылайăшне ялти инфратытăм, пĕчĕк ĕç укçи пăшăрхантарать. Çаксем пурте агропромышленность комплексĕн кадрсен резервне пырса тивеççĕ. Кадрсемпе çыхăннă ыйтăва республикăра татса парассишĕн тăрăшаççĕ-ха, анчах специалистсем çитменни куç умĕнчех.
Ку ыйтăва ЧР Ялхуçалăх министерстви те тишкерсех тăрать. Çак кунсенче министерствăн официаллă сайтĕнче Чăваш Енри АПК организацийĕсенчи специалистсемпе рабочи должноçĕсен вакантлă вырăнĕсен списокĕпе паллашма май пулчĕ. Майăн 1-мĕшĕ тĕлне пĕтĕмпе республикăри ялхуçалăх организацийĕсенче 426 ваканси пулнă, вăл шутра специалистсен - 139, рабочисен - 287. Республикăри кашни районтах ветеринарсем, зоотехниксем, агрономсем, механиксем, трактористсем, поварсем, доярсем, техник-осеменаторсем çитмеççĕ.
Чăваш патшалăх ялхуçалăх академийĕ хăйĕн выпускникĕсене ĕçе вырнаçтарас тĕллевпе кашни çулах районсен администрацийĕсен пуçлăхĕсемпе тĕлпулусем йĕркелет, тĕрлĕ предприяти-организацисемпе ĕç килĕшĕвĕсем тăвать. Çапах ялти специалистсен дефицичĕ çав-çавах упранса юлать.
Пирĕн районти ялхуçалăх органи-зацийĕсенче пĕтĕмпе 19 ваканси, ытларах специалистсен должноçĕсем - тĕп бухгалтер, зоотехник, ветеринари фельдшерĕ, агроном, инженер, осеменатор. Асăннă специалистсем "Нива", "Свобода", "Аккозинское", "Авангард", Н.Лисаев фермер хуçалăхĕнче кирлĕ.
А.ЗАМУТКИНА.
Источник: "Пирěн пурнăç"