20 мая 2016 г.
"Единая Россия" партин регионти йĕркелỹ комитетĕнче суйлав умĕнхи сасăлава йĕркелессипе çыхăннă ыйтусем тавра пресс-конференци иртрĕ. Унта парти представителĕсем малтанхи сасăлав мĕнле иртесси тата вăл суйлавран мĕнпе уйрăлса тăни пирки каларĕç. Майăн 22-мĕшĕнче Чăваш Енре малтанхи сасăлав кунĕ иртет. Республикăра пурĕ 236 участок ĕçлĕ, çĕршывĕпе вара - 19 пин. Сасăлав ирхи 8 сехетрен пуçласа каçхи 8 сехетчен пырĕ.
Çын хăйĕн хăш шутлав участокне каймаллине партин регионти уйрăмĕн сайтĕнче (chuvash.er.ru) "Малтанхи сасăлав" уйрăмра пĕлме пултарать. Çавăн пекех кашни суйлавçă йыхрав хучĕ илĕ. Малтанхи сасăлава кăмăл пуррисем пурте хутшăнма пултараççĕ. Вĕсен çумра паспорт пулмалла. Кашнинех виçĕ тĕрлĕ бюллетень парĕç: пĕрремĕшĕ - Патшалăх Думин кандидачĕшĕн пĕр мандатлă округпа, иккĕмĕшĕ - парти списокĕ-пе сасăламалли. Виççĕмĕшĕ вара - ЧР Патшалăх Канашĕн кандидачĕсемшĕн пĕр мандатлă округпа тата парти списокĕпе сасăламалли. Малтанхи икĕ бюллетеньре килĕшекен темиçе кандидат ят-хушамачĕ тĕлне те паллă лартма юрать, анчах пĕрререн кая мар. Икĕ-виçĕ кандидата та шанатăр-и - тархасшăн. Виççĕмĕш бюллетеньре вара икĕ паллăран кая мар лартмалла: пĕр мандатлă округпа тата парти списокĕпе суйланакан кандидатсемшĕн.
Палăртмалла, "Единая Россия" - суйлава кандидатсене çапла уççăн тăратакан пĕртен-пĕр парти. Партин Чăваш Республикинчи уйрăмĕн секретарĕн çумĕ, Шупашкар хула Пухăвĕн депутачĕ Леонид Черкесов каланă тăрăх, малтанхи сасăлав чи лайăх кандидатсене палăртма май парать - шăпах вĕсене суйлавçăсем власть органĕсенче хăйсен интересĕсене хỹтĕлеме шанаççĕ. Леонид Черкесов палăртнă тăрăх, агитаци тапхăрĕнче кандидатсем хатĕрленỹ ĕçĕсем ирттернĕ: суйлавçăсемпе, ĕç коллективĕсемпе тĕл пулнă, дебатсене хутшăннă. "Дебатсем хамăрпа пĕр шухăшлисене ĕçе явăçтармалли меслет пек питĕ пĕлтерĕшлĕ. Пĕр енчен çапла туни Раççей Президенчĕн Владимир Путинăн "малтанхи сасăлав "Единая Россия" партие çынсене çывăхрах тата уçăмлăрах тăвать" текен тезисне çирĕплетет. Тепĕр енчен - малтанхи сасăлав пĕтĕмлетĕвĕсем кашни кандидат хăйĕн кампанине мĕнле ирттернине кăтартса парĕç, суйлавçăсем кандидатăн республика умĕнчи чăн ĕçĕсене мĕнле хакланине палăртĕç", - тет Леонид Черкесов.
Источник: "Пирěн пурнăç"