25 мая 2016 г.
Шупашкарта ялхуçалăх продукцине сутакан "Çуркунне - 2016" уйăхлăх вĕçленнĕ. Йăлана кĕнĕ тăрăх "Çурçĕр ярмăркки" пасарта хăйĕн продукцине Чăвашпотребсоюзăн коопераци организацийĕсем те, вăл шутра Хĕрлĕ Чутай райповĕн ĕçченĕсем те, тăратнă.
Районти "Ялхуçалăх продукчĕсем" лавкка заведующийĕ Галина Лихутина тата сутуçи Ирина Дмитриева тухса çỹремелли суту-илĕве тăтăшах хутшăнаççĕ. Çавăнпа та ярмăрккăн юлашки кунĕнче райпосен продукцийĕ-сене сутма вĕсене шаннинчен тĕлĕнме кирлĕ мар. Сентресем çинче - çĕрулми, сухан, ыхра, панулми, хăмла пучаххи, шăлан, çăка чечекĕ, пыл. Çимелли уйрăм экспозици - салатсем, консервланă хăяр, помидор, алкогольсĕр ĕçмесем, вăл шутра Хĕрлĕ Чутай райповĕн "Янтарь" ТЯО туса илнĕ хурăн шывĕ. - Вырăнти çутçанталăк продуктне хула çыннисем уйрăмах кăмăллаççĕ, - палăртнă Чăвашпотребсоюз Канашĕн председателĕ, Чăваш Республикин Патшалăх Канашĕн депутачĕ Валерий Павлов ярмăрккă ĕçне инспекциленĕ май. - Туянакансене продукцийĕн пысăк пахалăхĕ тата йỹнĕ хакĕ илĕртеççĕ, мĕншĕн тесен ăна посредниксемсĕр тăратнă. Чăвашпотребсоюзăн предприятийĕсемпе организацийĕсем Шупашкар хула администрацийĕ чĕнсен ялхуçалăх продукцийĕн ярмăрккисене яланах хутшăнаççĕ. Иртнĕ уйăхлăха та хутшăнмасăр пулмарĕ. Туянакансем пире шанаççĕ, çак пулăшу вара пирĕншĕн питĕ кирлĕ.
Н.АНТОНОВА.
Источник: "Пирěн пурнăç"