25 мая 2016 г.
Майăн 22-мĕшĕнче Чăваш Енре пурăнакансем хăйсен интересĕсене "Единая Россия" политика партийĕнчен Раççей Патшалăх Думинче тата республикăн Патшалăх Канашĕнче хỹтĕлекен чи тивĕçлĕ кандидатсене суйларĕç. Вырсарникун, майăн 22-мĕшĕнче, Чăваш Енре "Единая Россия" партин малтанхи сасăлавĕ иртрĕ. Ун пĕтĕмлетĕвĕпе РФ Патшалăх Думин тата ЧР Патшалăх Канашĕн сентябрьти суйлавне хутшăнма ирĕк илекен кандидатсен списокне йĕркелĕç.
Палăртмалла, паянхи куна "Единая Россия" саккун кăларакан власть органĕсен суйлавне кандидатсене тăратас енĕпе чи уçă та демократи меслечĕпе усă куракан пĕртен-пĕр политика партийĕ шуланать. РФ Патшалăх Думин депутачĕ Алена Аршинова палăртнă тăрăх, вăл та çак кун ыттисемпе танах И.Н.Ульянов ячĕллĕ Чăваш патшалăх университетĕнче вырнаçнă участокра сасăлава хутшăннă, ытти политика партийĕсем хăйсен кандидачĕсен суйлав умĕнхи списокĕ-сене ăнланмалла мар йĕркелеççĕ. "Единая Россия" партин малтанхи сасăлавĕнче вара çынсем хăйсемех суйлавра сасăлама шухăшланă кандидатах суйлаççĕ. Малтанхи сасăлава суйлав умĕнхи тĕп "репетици" пек пăхма пулать пулин те, республикăра пурăнакансем сасăлав участокĕсене питĕ йышлăн пухăннă. Пĕр енчен, çакă "Единая Россия" партие суйлавçăсем питĕ шаннине тепĕр хутчен çирĕплетсе панă. Тепĕр енчен илсен, çынсемшĕн хăйсен интересĕсене çĕршывăн тата республикăн саккун кăларакан власть органĕсенче кам хỹтĕлесси пурпĕрех пулманни курăнать. Чăн та, малтанхи сасăлава хутшăнаслăх питĕ пысăк пулнă, урнăсем патне черетре тăма та тивнĕ.
Республика Пуçлăхĕ Михаил Игнатьев, хăйĕн çемйипе Хусанкай ячĕллĕ Культура керменне сасăлава килнĕскер, бюллетеньсем илме ыттисемпе танах черетре тăнă, çав хушăрах çынсемпе калаçса илме те ĕлкĕрнĕ. Михаил Васильевич Чăваш Енре пурăнакансем сасăлав участокĕсене килсе республика тата çĕршыв шăпи хăйсене интереслентернине, вĕсем мирлĕ те килĕшỹре пурăнасшăннине, обществăпа политика пурнăçĕ чылай çуллăха стабильлĕ пуласса кăмăлланине палăртнă, çакă ыранхи куна шанчăклăн пăхма хистет те.
Шупашкар хула пуçлăхĕ Леонид Черкесов та суйлав участокне хăйĕн мăшăрĕпе тата икĕ ывăлĕпе çитнĕ. Вăл малтанхи сасăлава яваплăха туйса килнĕ граждансене тата сасăлав участокĕсенче пысăках мар уяв пек сĕм кĕртме тăрăшнисене тав тунă. "Паян чи нумай сасă пухнă кандидатсем сентябрьте РФ Патшалăх Думине тата ЧР Патшалăх Канашне тивĕçлĕн каясса шанатăп", - пĕлтернĕ Леонид Черкесов. Майăн 22-мĕшĕнче малтанхи сасăлава хутшăннисенчен нумайăшĕ активлă гражданла позицие епле палăртмаллине тĕслĕх кăтартнă. Çапла Николай Малов чи малтан тăван Етĕрне хулинче сасăлава хутшăннă, унтан Шупашкарти тата Çĕнĕ Шупашкарти хăш-пĕр шутлав участокĕсене çитсе курнă. "Эпир хамăр суйлавçăсем патне уççăн утатпăр, вĕсемпе канашлатпăр, вĕсен сентябрĕн 18-мĕшĕнче суйлав учас-токĕсенче "Единая Россия" партирен кама курас килнине пĕлесшĕн", - палăртрĕ вăл.
Николай Малов малтанхи сасăлав паллă политиксене хăйсем пирки пĕлтерме кăна мар, "Единая Россия" майлă тăракан мĕн пур çынна та, çав шутра партире тăманнисене те, май туса панине хушса каларĕ. Çавăн пекех вăл малтанхи сасăлавра выляса яракансем пулманнине пĕлтерчĕ, мĕншĕн тесен унта хутшăнакансем пурте _ пĕр команда, вĕсем валли çĕршывпа республика ырлăхĕшĕн тăрăшма ĕç тупăнатех. "
Единая Россия" партин районти уйрăмĕнчен пĕлтернĕ тăрăх, майăн 22-мĕшĕнчи малтанхи сасăлава малтанласа шутласа пăхнипе 3 пин те 100 çын е районти халăх йышĕн 22,12 проценчĕ хутшăннă.Пĕтĕмпе районĕпе сакăр сасăлав участокĕ ĕçленĕ. РФ Патшалăх Думин кандидачĕ-семшĕн чи нумай сасă Алена Аршиновашăн тата Леонид Черкесовшăн панă, ЧР Патшалăх Канашĕн кандидачĕсем хушшинче вара Валерий Павловпа Николай Малов, Александр Кузнецов ытларах сасă пухнă.
Источник: "Пирěн пурнăç"