27 мая 2016 г.
Майăн 24-мĕшĕнче районти Культура çуртĕнче "Чутай пики-2016" конкурс иртрĕ. Районти талантлă çамрăксене тупса палăртас, чăваш халăхĕн йăли-йĕркипе культурине упраса хăварас тĕллевпе ирттернĕ конкурса Чăваш наци конгресĕн районти уйрăмĕ (ертỹçи - Юлия Мареева) йĕркелерĕ.
Районти чи пултаруллă та маттур, илĕртỹллĕ те çепĕç, ĕçчен те сăпайлă пилĕк хĕр хутшăнчĕ конкурса. Пикесем хăйсемпе паллаштарчĕç, ташласа-юрларĕç, чăвашлăхпа çыхăннă ыйтусем çине хуравларĕç, сцена çине чăваш тумĕпе тухса чăваш апат-çимĕçне пĕçерме пĕлнине кăтартса пачĕç.
Чăваш наци конгресĕн президенчĕн çумĕ Валерий Клементьев ертсе пыракан сумлă жюрие маттур хĕрсенчен чи лайăххине, пултаруллине суйласа илме çăмăл пулмарĕ. Çапах та конкурса хутшăннă пикесен уйрăмлăхĕсене, çи-пуçне, юрлас тата ташлас ăсталăхне, илĕртỹлĕхне тата ытти пахалăхĕсене шута илсе "Чутай пики-2016" ята Тралькасси ял тăрăхĕнчи Татьяна Мурайкинана пама йышăнчĕç. Татьяна Хĕрлĕ Чутайри вăтам шкулта 10-мĕш кадет класĕнче вĕренет, илемлĕ те уçă сассипе ачаранах питĕ хитре юрлать. Валерий Клементьев Татьянăна кăçалхи июль уйăхĕнче Крымра иртекен пĕтĕм чăвашсен Акатуйне хутшăнма ирĕк паракан сертификат парса чысларĕ.
"Куракансем кăмăлланă пике" ята Хĕрлĕ Чутай ял тăрăхĕнчи Анна Сармандейкина тивĕçрĕ. Анна та кадет класĕнче вĕренет, юрра-ташша ăста.
"Хỹхĕм пике" ята Мăн Этмен ял тăрăхĕнче пурăнакан, 10-мĕш класра вĕренекен Анастасия Фондеркина тивĕçрĕ.
"Çепĕç пике" ята тивĕçнĕ Татьяна Ефремова Çĕн Атикасси шкулĕнче 9-мĕш класра вĕренет, конкурсра вăл Кив Атикасси тата Штанаш ял тăрăхĕсен чысне хỹтĕлерĕ.
"Ăспике" ята Пантьăк ял тăрăхĕнче пурăнакан, Мăн Этменти вăтам шкулта 11-мĕш класра вĕренекен Карина Селянкинана парса чысларĕç.
Конкурс савăнăçлă та ырă кăмăллă лару-тăрура иртрĕ. Пикесем черетлĕ ĕçсене пурнăçлама хатĕрленнĕ хушăра "Пилеш" ача садне çỹрекенсем, Ачасен искусство шкулĕнче вĕренекенсем тата районти ытти артистсем куракансене хăйсен ташши-юррисемпе савăнтарчĕç.
Çакна та палăртса хăвармалла, конкурса мĕн пуçласа вĕçне çитичченех илемлĕ чăваш чĕлхипе Лариса Краснова ертсе пычĕ, унсăр пуçне вăл куракансене хăйĕн илемлĕ юррисене парнелерĕ.
Пĕтĕмĕшле илсен чăвашлăха халалланă конкурсра чăваш чĕлхи, чăваш кĕвви кăна янăрани, районти илĕртỹллĕ чăваш пикисем хăйсен пултарулăхĕпе чăвашла паллаштарни пурин кăмăлне те кайрĕ.
Алина КАРПОВА.