27 мая 2016 г.
Патшалăх служащисен пенси çулĕ ỹсет тата ятарлă йĕркесемпе çирĕпленет.
Çĕршыв Президенчĕ саккуна 143-ФЗ номерпе майăн 23-мĕшĕнче алă пуснă, 2017 çулхи январĕн 1-мĕшĕнчен пуçласа вăя кĕрет.
Патшалăх тата муниципаллă служащисен пенси çулĕ çултан çул çур çуллăха ỹссе пырĕ. Кăçал - юлашки çул, арçынсем тивĕçлĕ канăва 60 çулта тухаççĕ, хĕрарăмсем - 55 çулта. Çитес çултан пуçласа вара хĕрарăмсем 55,5 çулта пенсие тухĕç, арçынсем - 60,5 çулта. 2018 çулта хĕрарăмсем - 56 çулта, арçынсем - 61 çулта. Çапла кашни çул 6 уйăх хушăнса 63 тата 65 çулсем çитиччен 2026 тата 2032 çулсемччен. Çĕнĕ улшăнусем патшалăх, муниципаллă служащисене тата патшалăх, муниципаллă должноçсене йышăна-кансене пырса тивеççĕ, РФ Ĕç министерствин кăтартăвĕ сем тăрăх вĕсем 1,1 млн ытла шутланаççĕ. Çавăн пекех паян патшалăх службин ĕç стажĕ 15 çултан сахал мар пулмалла. Çĕнĕ улшăнупа вара чи пĕчĕк ĕç стажĕ - 20 çул. Ку та çултан çул 6 уйăх хушăнса 2026 çулчен ỹссе пырĕ. Ертỹçĕсем вара 70 çул тултариччен ĕçлеме пултараççĕ. Ĕç стажĕ çитсен служащисен пенси укçин виçи ĕç шалăвĕн 45 проценчĕпе танлашĕ. Унтан кашни çул 3 процент ỹссе пырĕ. Чи пысăк виçе - 75 процент. Пенси укçине шутланă май оклада шута илеççĕ, премие тата ыттисене шута илмеççĕ. Федераллă патшалăх служащийĕсен, сăмахран, оклачĕ пысăк мар, республикăрисен вара вĕсенчен ытларах.
Асăннă улшăнусем тивĕçлĕ канăва тухнисене валли мар.
РФ Ĕç министерствин кăтартăвĕсем тăрăхсаккуна çакăн пек улшăнусем кĕртни çулталăкне 600 млн тенкĕ перекетлет. Перекетленĕ укçана пенсие ỹстерме хывĕç.
Алина ОРИНОВА.