23 июня 2016 г.
Райпо тытăмĕнчи "Четайское" тулли мар яваплă общество шутне çăкăр завочĕ, çĕвĕ, пулă тĕтĕмлекен тата кăлпасси цехĕсем кĕреççĕ. Кăлпасси цехĕ хута кайнăранпа кăçалхи октябрь уйăхĕнче 18 çул çитет. Малтанхи çулсенче цехра çурма тĕтĕмленĕ, пĕçернĕ кăлпассисем туса кăларнă. 2004 çултанпа унта пельменьсем, 2006 çултан пуçласа тĕрлĕ çурма фабрикатсем хатĕрлеме тытăннă. Хальхи вăхăтра кунта 30-35 тĕрлĕ продукци туса кăлараççĕ, ытларах - çурма фабрикатсем. 2015 çулхи ĕç кăтартăвĕсемпе кăлпасси цехĕ республикăри потребкооперацин организацийĕсемпе предприятийĕсем хушшинчи экономика ăмăртăвĕнче иккĕмĕш вырăн йышăнма пултарнă.
Çак çитĕнỹре кăлпасси цехĕнче ĕçлекен Елена Глибина мастерăн тỹпи те пур. Елена Григорьевна Мăн Этмен ялĕнче вырнаçнă кăлпасси цехĕнче мастерта 17 çул ĕçлет. Унччен вăл ялхуçалăх продукчĕсен лавккинче сутуçăра, хатĕрлев кантурĕнче ĕçле-нĕ. Кĕскен каласан, пĕтĕм ĕç-хĕлне райпо тытăмĕпе çыхăнтарнă, çак сферăра вăл 27 çул тăрăшса вăй хурать. Çавна май Акатуйра Чăваш Патшалăх Канашĕн депутачĕ, Чăвашпотребсоюз председателĕ Валерий Михайлович Павлов Елена Григорьевнăна потребкоопераци тытăмĕнче нумай çул тỹрĕ кăмăлпа ĕçленĕшĕн Чăвашпотребсоюзăн Хисеп грамотипе наградăларĕ.
А.ЗАМУТКИНА.
Источник: "Пирěн пурнăç"