29 июня 2016 г.
Хĕрлĕ Чутай шкулĕн салтак çулне çитмен çамрăкĕсем Краснодарта республика чысне хỹтĕлеççĕ
Хальхи вăхăтра Краснодар хулинче салтак çулне çитмен çамрăксен Пĕтĕм Раççейри Спартакиади пырать. Тăван шкул, район тата республика чысне унта Хĕрлĕ Чутай шкулĕнче вĕренекен яшсем хỹтĕлеççĕ.
Июнĕн 24-мĕшĕнче асăннă шкулăн вунă вĕренекенĕ опытлă тренер, Чăваш Республикин тава тивĕçлĕ учителĕ Эдуард Романов ертсе пынипе Краснодар хулине тухса кайрĕ. Çĕнтерỹпе кăна таврăнма сунса вĕсене пĕрле вĕренекенсем, ашшĕ-амăшĕ, вĕрентекенсем ăсатса ячĕç.
Унччен вара çамрăксем уйăх ытла кашни кун ир-каç тренировкăсене çỹрерĕç, стройпа утас, винтовкăран перес, ишес, чупас тата ытти ăсталăха туптарĕç. Пейнтболла выляса пăхма пĕр кунлăха Шупашкара та кайса килчĕç. Ăмăртусене тухса кайиччен мана вĕсемпе курса калаçма тỹр килчĕ. "Хамăртан мĕн килнине пĕтĕмпех тума шантаратпăр", - терĕç 16-17 çулхи яшсем.
Хăйсен сăмахне тытаççех пулĕ вĕсем. Паллах, çăмăл пулмĕ.10 каччăран виççĕшĕ кун пек ăмăртусене пĕрремĕш хут хутшăнать. Ытти регионсемпе танлаштарсан, пирĕн командăна пĕр шкулта вĕренекен ачасенчен пухнă, вĕсемпе пĕр тренер ĕçлет. Çапах та хĕрлĕчутайсем çĕршыври 50 ытла регионтан пухăннă командăсем хушшинче çухалса каймасса, хăйсене лайăх енчен кăна кăтартса парасса чунтанах шанатпăр. Юлашки çулсенче пирĕн район команди асăннă Спартакиадăн финалĕнче çĕршыври чи лайăх 5 команда шутне кĕрсе.
Краснодар хулинчи Кадетсен Президент училищин тытăмĕнче иртекен Пĕтĕм Раççейри Спартакиада июлĕн 3-мĕшĕнче вĕçленет.
А.КАРПОВА.