29 июня 2016 г.
Апрелĕн 14-мĕшĕнче пĕр гражданин кăнтăрла хыççăн тăватă сехет тĕлнелле Тихăнушкăнь ялĕнче пурăнакан ватă патĕн-че хăнара пулнă, лешĕ урама тухнипе усă курса сĕтел çинчи курупкари 50 пин тенке вăрланă та преступлени тунă вырăнтан çухалнă.
Инкек тỹснĕ хĕрарăм пĕлтернĕ тăрăх, вăл хăйĕн пенси укçине малти пỹлĕмре тытнă, ăна телевизор çывăхĕнчи картон курупкана пухса пынă. Шăп та лăп апрелĕн 15-мĕшĕнче курупкари укçа 50 пин тенке çитнĕ. Çак кун 15 сехет тĕлнелле хĕрарăм ялти райпо лавккине çул тытнă, унта пĕр çынна тĕл пулнă. Вăл вара ватăран кивçен укçа ыйтнă. Хĕрарăм укçи-тенкине çурт юсама пухса пынине пĕлтернĕ, кивçен пама килĕшмен. Унтан арçын хĕрарăм килне пынă, лешĕ качака сума тухнă хушăра пỹлĕмре пĕчченех ларса юлнă, çакăнпа усă курса ун пенси укçине тупса вăрласа тухнă. Тепĕр 15-20 минутран кил хуçи пỹлĕме кĕнĕ, хăна çухалнине асăрханă. Тем шиклентернипе вăл курупкана тĕрĕслес тенĕ, унта вара 500 тенкĕлĕх тăватă суя купюра кăна выртнă.
Арçын çакăнпа лăпланман, çывăх урамри пĕр гражданин патне кайнă, Муркаш районĕнчи савнине илсе килме ыйтнă. Лешĕ килĕшнĕ. Çул çине тепĕр юлташне илнĕ. Вĕсем çул тăршшĕпех хаяррине тутаннă, киле мĕнле çитнине те астуман, кĕсьери укçа-тенкĕ ăçта "çухалнине" те сиссе юлайман.
Асăннă гражданин хăйĕн айăпне йышăнчĕ. Уголовлă ĕçе суда ярса патăмăр.
Э.КОНДРАТЬЕВ, следователь.