29 июня 2016 г.
Чăваш Республикинче те наука, литература тата искусство енĕпе пысăк тỹпе хывакан пултаруллă ĕçченсене хавхалантарма тăрăшаççĕ. Июнĕн 20-мĕшĕнче Чăваш Ен Пуçлăхĕ Михаил Игнатьев асăннă сферăн паллă представителĕсене патшалăх стипендийĕ парса тăрасси çинчен хушу кăларнă.
Палăртма кăмăллă, пултаруллисен йышне пирĕн ентеш Николай Котеев драма артисчĕ те кĕнĕ. Николай Александрович çулталăк хушши уйăхсерен 3000 пин тенкĕпе танлашакан патшалăх стипендине илсе тăрĕ.
Сăмах май, Николай Котеев Хĕрлĕ Чутай салинче çуралнă. 1983 çулта Мускаври М.С.Щепкин ячĕллĕ театр училищинчен вĕренсе тухнă хыççăн Чăваш патшалăх академи драма театрĕнче ĕçлеме пуçланă. Çавăнтанпах вăл драмтеатр актерĕнче вăй хурать. Театрта ĕçленĕ май питĕ нумай спектакльте вылянă, вун-вун роль ăнăçлă калăпланă. Николай Котеев "Чĕнтĕрлĕ чаршав" республикăри вуннăмĕш конкурсра "Чи лайăх арçын ролĕ" номинаци (А.Н.Толстой пьеси тăрăх лартнă "Куккук куççулĕ" спектакль) лауреачĕ пулнă.
А.ЗАМУТКИНА.