29 июня 2016 г.
Кашни çулах июнь уйăхĕн вĕçĕнче районти шкулсенче вĕренсе тухакансен ăсату каçĕсем иртеççĕ. Кăçал районти пур выпускника та пĕр çĕре пухакан çамрăклăхпа илемлĕх, çунатлă ĕмĕтсен уявĕ июнĕн 27-мĕшĕнче Хĕрлĕ Чутай салинчи Çĕнтерỹ лапамĕнче иртрĕ.
Уяв 21 сехетре пуçланчĕ. Çак вăхăталла лапам çынсемпе тулчĕ те ĕнтĕ: хитре кĕпесем тăхăннă, илемлĕ кулăпа çиçекен хĕрсем, галстуклă костюмсем тăхăннăран сумлăрах курăнакан яштака каччăсем, вĕсен ашшĕ-амăшĕ, вĕрентекенсем...
Савăнăçлă та хумхануллă самантра шкул пĕтерекенсене ЧР Патшалăх Канашĕн депутачĕ Валерий Павлов, район пуçлăхĕ Александр Степанов, райадминистраци пуçлăхĕ Александр Башкиров тата ытти сумлă хăнасем саламларĕç, патшалăх экзаменĕсене ăнăçлă тытнăшăн тав турĕç, малашлăха пысăк шанăçпа пăхма, килĕшекен професси суйласа илсе пурнăç тăрăх тивĕçлĕн утма сунчĕç.
Уявăн пĕлтерĕшлĕ саманчĕсенчен пĕри шкултан медальсемпе вĕренсе тухнисене чыслани пулчĕ. Кăçал Хĕрлĕ Чутайри вăтам шкулти Ангелина Абакумова, Людмила Елгайкина, Анна Петрова, Татьяна Полозина, Диана Тимофеева, Максим Тинехпейкин, Анна Родионова, Анна Максимова, Мăн Этмен шкулĕнчи Татьяна Еремеева, Карина Селянкина, Татьяна Мартышкина, Çĕн Атикасси шкулĕнчи Вероника Егорова медальсене тивĕçрĕç. Вĕсен ашшĕ-амăшне тав çырăвĕсем парса чысларĕç.
Ăшă тав сăмахĕсем, сывпуллашу вальсĕ, юрă-кĕвĕ ăсату каçне илемлетрĕç. Унтан тăван шкулпа сывпуллашакансем валли ташă каçĕ пулчĕ.
Ир енне вара шурăмпуç çăлтăрĕ ĕнерхи ачасен умри пурнăç çулне çутатрĕ...
Алина КАРПОВА.