06 июля 2016 г.
Июлĕн 2-мĕшĕнче районти кооператорсем хăйсен професси уявне паллă турĕç
Уяв кунĕнче район центрĕнче райпо предприятийĕсем хăйсен таварне сĕнчĕç, унтах хамăр республикăри тавар туса кăларакансен апат-çимĕçне тутанса пăхма пулчĕ. Çав хушăрах районти Культура çурчĕ умĕнче ачасем валли дискотека иртрĕ. Хăйсен ташă пултарулăхне кăтартса панă пур ачана та мороженăйпа сăйларĕç.
Уявăн савăнăçлă саманчĕсенчен пĕри "Встреча" кафере çамрăксем валли хушма зал уçни пулчĕ. Кунта канма илемлĕ те хăтлă, уйрăм пỹлĕмсем пур, унтах тỹлевсĕр интернет (Wi-Fi) тăвасшăн. Пушă вăхăтне çакăнта ирттерес текен çамрăксене алкогольсĕр сĕткенсем кăна сĕнĕç.
Унтан уява пухăннисене ЧР Патшалăх Канашĕн депутачĕ, Чăвашпотребсоюз Канашĕн председателĕ Валерий Павлов, район пуçлăхĕ, райпо председателĕ Александр Степанов, райадминистраци пуçлăхĕ Александр Башкиров саламларĕç, потребкоопераци тытăмĕнче тăрăшулăхпа палăрнă ĕçченсене тĕрлĕ шайри наградăсем парса чысларĕç.
Чăваш Республикин Патшалăх Канашĕн Хисеп грамотине "Питание" ТЯО поварĕ Розалия Ульянова тивĕçрĕ. ЧР Экономика министерствин Хисеп грамотине "Четайское" ТЯО кондитерне Римма Судакована тата райпон тĕп бухгалтерĕн çумне Ольга Самышкинана парса чысларĕç. Раççей Федерацийĕн Центросоюзĕн Хисеп грамотине райпо председателĕн техника енĕпе ĕçлекен çумĕ Валерий Максюткин илчĕ. "Потребкоопераци тытăмĕнче 30 çул хушши тивĕçлĕ ĕçленĕшĕн" паллăпа Хĕрлĕ Чутай пасарĕн заведующине Валентина Михеевана чысларĕç. "Раççей потребкооперацийĕн ветеранĕ" ята райпо ревизорĕ Светлана Селивестрова тивĕçрĕ, "Чăваш Республикин потребкооперацийĕн ветеранĕ" ята - "Четайское" ТЯО ĕçченĕ Надежда Миронова. "Питание" ТЯО официантне Наталия Оринована "Раççейри кооператив юхăмĕн çамрăк лидерĕ" паллăпа чысларĕç.
Потребкоопераци пуянлăхĕ - ĕçчен те тăрăшуллă çынсем. Уяв кунĕнче вĕсенчен чи лайăххисене тĕрлĕ номинацисенче чысларĕç. "2015 çулхи чи лайăх сутуçă" ята Алена Егорова тивĕçрĕ, "Чи лайăх çăкăр пĕçерекен" - Валентина Максимова, "Чи лайăх кондитер" - Лилия Федорова, "Чи лайăх повар" - Светлана Илюшкина. Райпо ĕçченĕсен професси уявне чăваш эстрада çăлтăрĕсем хăйсен юрри-ташшипе сăн кĕртрĕç.
А.КАРПОВА.