08 июля 2016 г.
Çулсеренех июль уйăхĕн иккĕмĕш вырсарникунĕнче почта çыхăнăвĕнче ĕçлекенсем хăйсен професси уявне паллă тăваççĕ. Пур тапхăрта та почта ĕçченĕсен ĕçĕ çăмăл пулман. Халĕ те, информаци технологийĕсем хăвăрт аталаннă чухне, вăл хăйĕн пĕлтерĕшне çухатмасть, ял çыннисемшĕн чи кирлĕ çыхăну мелĕ пулса юлать. Хальхи самана таппинче почта çыхăнăвĕнче чи чăтăмлисем кăна ĕçлеççĕ тесе калас килет. Почтальон халăх патне хаçат-журналпа çырусем кăна мар, пенси те вăхăтра çитерсе парать-çке. Ку кăна-и? Ахаль те çăмăл мар сумкине унăн ял çыннисене сĕнме тĕрлĕ тавар тултарса йывăрлатма тивет. Мĕн тăвас тетĕн, ĕç йĕрки çапларах халĕ. Асăнтăмăр ĕнтĕ, почтăра тỹсĕмлисем тăрă-шаççĕ. Вĕсем район çыннисене çĕнĕ хыпарсемпе паллаштарма васкаççĕ. Çĕнĕ хыпарĕсем вара район тĕкĕрĕнче - "Пирĕн пурнăç" хаçатра - кун çути кураççĕ. Шăпах ăна анлă сарас тĕллевпе тăрăшаççĕ те куллен почтальонсем. Паян манăн уйрăмах Утаркассипе (начальникĕ - Вера Николаевна Федорова) Хĕрлĕ Чутай (начальникĕ - Василий Александрович Кораков) почта уйрăмĕсене тав сăмахĕ калас килет, вĕсем ĕçе парăнни куç умĕнчех: йывăрлăха çĕнтерсе малаллах утаççĕ. Çавăн пекех район хаçатне ытларах халăх патне çитерекенсене те тав тăватăп. Чи ăшă сăмаха Хусанушкăнь почта уйрăмĕн почтальонĕ Зоя Николаевна Семенова тивĕç, халăх патне вăл "Пирĕн пурнăç" хаçата 123 экземпляр çитерет. Хĕрлĕ Чутай почта уйрăмĕн почтальонĕсем те - Светлана Витальевна Яхатина район хаçатне 124 çынна çырăнтарнă, Альбина Владимировна Митрофанова - 95 экз., Атнар ялĕн почтальонĕ Татьяна Михайловна Князева - 97 экз. - лайăх ĕçлеççĕ. Вĕсене манăн кăçалхи "Чи лайăх почтальон" ята та парас килет. Шĕмшеш почта уйрăмĕн почтальонĕ Александр Федорович Михеев - 82, Хусанушкăнь почта уйрăмĕн почтальонĕ Любовь Порфирьевна Долгова - 78 экз., Утаркасси почта уйрăмĕн почтальонĕсем Валентина Николаевна Микушкина - 77, Инна Ильинична Захарова 76 кил-çурта "Пирĕн пурнăç" хыпарĕ-семпе паллаштараççĕ. Шĕмшеш почта уйрăмĕн почтальонĕ Елизавета Ивановна Афоркина, Пантьăк почта уйрăмĕн начальникĕ Наталья Владимировна Морозова тата почтальонĕ Юрий Алексеевич Ксенофонтов, Ачкасси почта уйрăмĕн начальникĕ Клара Александровна Данилова, Ишеккассипе Тумликасси ялĕсен почтальонĕ Галина Николаевна Сатлайкина, Тралькасси почта уйрăмĕн начальникĕ Галина Николаевна Козлова тата почтальонĕ Галина Николаевна Куропаткина, Атнар почта уйрăмĕн почтальонĕсем Алина Владимировна Степанова, Роза Александровна Кондратьева, Валентина Валентиновна Сапожникова, Николай Владимирович Нестеренко, Шĕмшеш почта уйрăмĕн почтальонĕ Наталья Васильевна Сергеева, Тури Çĕрпỹкасси ялĕн почтальонĕ Ольга Анатольевна Кириллова район хаçатне çырăнтарас кăтартăва ытларах ỹстернĕ. Утаркасси почта уйрăмĕн почтальонĕсем Галина Витальевна Порфирьева, Римма Дмитриевна Жидкова ĕç кăтартăвĕсене чакарман. Паллах, район хаçатне ытларах сарас тесе ытти почтальонсем те вăй хунă. Апла пулсан пурне те, пур çыхăну уйрăмĕсен ĕçченĕсене те професси уявĕ ячĕпе саламлатăп. Эсир район çыннисем патне çитерекен хыпарсем яланах лайăх пулччăр, ĕçĕрсем ăнса пыччăр, малашне те район тĕкĕрне ытларах сарма сирĕн сывлăхăрсем çирĕп пулччăр, кăтартăвăрсем çулран-çул ỹссе кăна пыччăр, ỹсĕмсен чикки ан пултăр.
Алина ОРИНОВА.