15 июля 2016 г.
Республика Пуçлăхĕ Михаил Игнатьев ĕнер, июль уйăхĕн 14-мĕшĕнче, пирĕн районта ĕçлĕ тĕлпулусем ирттерчĕ. Малтанах вăл район больницин инфекци уйрăмĕнче пулчĕ, кунта ирттернĕ юсав ĕçĕсемпе паллашрĕ, уйрăмра вăй хуракан медицина ĕçченĕсемпе, пациентсемпе калаçрĕ. Çавăн пекех республика ертỹçи ЧР сывлăх сыхлавĕн министрĕпе Алла Самойловапа тата Иван Игнатьев тĕп врачпа пĕрле район больницин ĕç-хĕлне тишкерчĕ.
Унтан районти Культура çуртĕнче муниципалитетăн 2016 çулхи пĕрремĕш çур çулĕнчи социаллă пурнăçĕпе экономика аталанăвне пĕтĕмлетрĕç. Канашлăва РФ Патшалăх Думин депутачĕ Алена Аршинова, ЧР Патшалăх Канашĕн депутачĕсем Николай Маловпа Валерий Павлов, ЧР Финанс министрĕ Светлана Енилина, ЧР вĕренỹ министрĕн тивĕçĕсене пурнăçлакан Светлана Петрова, ЧР экономика аталанăвĕн министрĕн тивĕçĕсене пурнăçлакан Инна Антонова, ЧР культура министрĕн çумĕ Вячеслав Оринов, район пуçлăхĕ Александр Степанов, райадминистраци пуçлăхĕ Александр Башкиров хутшăнчĕç.
Республика Пуçлăхĕ çакăн пек пухăнса халăха пăлхантаракан, кирлĕ ыйтусене сỹтсе явни çынсен пурнăçне лайăхлатмашкăн хушма май тупма пулăшнине палăртрĕ, шкулсене çĕнĕ вĕренỹ çулне хатĕрленине, социаллă çивĕч ыйтусене татса панине тĕрĕслесех тăнине каларĕ. Александр Башкиров районăн кăçалхи ултă уйăх кăтартăвĕсемпе паллаштарчĕ. Районта хресченпе фермер хуçалăхĕсен шучĕ ỹснине каларĕ. Депутатсемпе министрсем те тухса калаçрĕç канашлура, районăн тĕрлĕ сферăри çитĕнĕвĕсем çинче чарăнчĕç, малалла аталанмалли ĕçсене палăртрĕç.
Канашлăва уçиччен Михаил Игнатьев Виталий Кузьмичпа Наталья Викторовна Чишкинсене тата Владимир Александровичпа Ирина Евгеньевна Захаровсене "Юратупа шанчăклăхшăн" медальсем парса чысларĕ. Районти нумай ачаллă çемьесем - Алина Николаевнăпа Евгений Анатольевич Майоровсем тата Алина Геннадьевнăпа Владимир Иванович Мурайкинсем - республика Пуçлăхĕн аллинчен тỹлевсĕр çĕр участокне тивĕçнине ĕнентерекен сертификат илчĕç.
Канашлăва пĕтĕмлетнĕ май республика ертỹçи пирĕн пуçаруллăрах пулмаллине, ыйтусене татса парас, пурнăç шайне ỹстерес тесен пултаруллă çынсене ытларах явăçтармаллине каларĕ: "Эпир пĕрле пулнăран вăйлă. Маттур, хĕрлĕчутайсем!" - терĕ Михаил Игнатьев хăйĕн сăмахне пĕтĕмлетнĕ май.
Юлашкинчен Михаил Игнатьев тата сумлă хăнасем район библиотекинче Хĕрлĕ Чутай шкулĕнчи кадетсемпе тата вĕсен вĕрентекенĕсемпе тĕл пулса калаçрĕç.
Алина КАРПОВА.