29 июля 2016 г.
Раççей почтин кунĕнче Хĕрлĕ Чутай почта уйрă- мĕн начальникĕн çумĕ Нина Николаевна Товина чылай наградăна тивĕçрĕ. Чи пĕрремĕшĕ почта çыхăнăвне аталантарас ĕçе тỹпе хывнăшăн "Раççей почти" ФПУП-ăн Хисеп грамоти. Иккĕмĕшĕ - ĕçре тĕслĕх кăтартнăшăн 15 пин тенкĕ преми. Виççĕмĕшĕ - нумай çул тỹрĕ кăмăлпа ĕçленĕшĕн тата профсоюз ĕçĕ-хĕлĕнче активлă пулнăшăн республикăри профсоюз комитечĕн Хисеп грамоти.
Раççей грамотипе Нина Николаевнăна Мускав хулинче чысларĕç. Хисеп грамотине илме Мускавран ун патне ятарлă çыру янă. Вăл июлĕн 11-17-мĕшĕсенче Мускав хулинче пулчĕ: çĕршывăн тĕп хулин пурнăçĕпе тата почта ĕçĕн çĕнĕлĕхĕсемпе паллашрĕ.
Нина Николаевна Товина 1961 çулта Туктамăш ялĕнче кун çути курнă. Шкул хыççăн бухгалтер профессине алла илнĕ. 1980 çулта район почтамтĕнче вăй хума тытăннă. Тăрăшуллă çамрăка экономист тата кадрсен пайĕн тивĕçĕсене те пурнăçлама шаннă. 2008 çултан вара Нина Николаевна Хĕрлĕ Чутайри почта уйрăмĕн начальникĕн çумĕнче тăрăшать. Нина Товинан почта тытăмĕнчи пĕтĕмĕшле ĕç стажĕ 35 çулпа танлашать. Нина Николаевна хăйне шанса панă ĕçе тỹрĕ кăмăлпа пурнăçлать, çултан-çул ĕç кăтартăвне ỹстерсе пыма тăрăшать. Çакна кашни çулах Раççей почтин кунĕнче ăна тĕрлĕ наградăсемпе чыслани те çирĕплетет.
А.ОРИНОВА.
Источник: "Пирěн пурнăç"