05 августа 2016 г.
Район прокуратури çурт-йĕр фондне пулăшакан организацисен ĕç-хĕлне тĕ рĕслерĕ, "Жилсервис" ТЯО-на та çитсе курчĕ. Мероприяти ирттернĕ хушăра хăш-пĕр çитменлĕхсем çиеле тухрĕç.
Çапла, Хĕрлĕ Чутай салин Çĕнĕ урамĕнчи 3-мĕш çурта кирлĕ чухлĕ тимлĕх уйăрман. Икĕ подъездлă, икĕ хутлă кирпĕч çурта 1969 çулта купаланă. Паллă ĕнтĕ, ăна тивĕçлĕ пăхмасан вăл юхăнсах каять. Унăн отмостки вырăнăн-вырăнăн юрăхсăра тухнă, çуркаланса пĕтнĕ. Унпа пĕрлех, организаци юсавсăр лаптăксене юсамалли плана пăхса хунă, анчах темĕнле сăлтава пула пурнăçламалли ĕçсем çинчен мансах кайнă.
Çурт стенин аялти пайĕн ванса пĕтнĕ штукатурки вара хваттерсенче пурăнакансене кăна пăшăрхантарнă. Асăннă çуртăн çуркуннехи тишкерĕвĕ те пулнă, анчах çитменлĕхĕсене акта кĕртме "маннă". Çакăн йышши çитменлĕхсем Çĕнĕ урамри 5-мĕш çуртра та, ытти нумай хваттерлĕ çуртсенче те пулчĕç. "Жилсервис" ТЯО-ра ĕçлекен уйрăм граждансем хăйсен тивĕçĕсене туллин пурнăçлама маннăшăн алла представлени илчĕç. Çитменлĕхсене пĕтермеллех, панă сăмаха тытмаллах.
Сергей ДАНИЛОВ, район прокурорĕн тивĕçĕсене пурнăçлакан.
Источник: "Пирěн пурнăç"