17 августа 2016 г.
Мускав, Рязань тата Пермь облаçĕсенче чир тупăннă хыççăнах пĕр хушă сыснасен Африка мурĕ пирки сахал калаçма тытăннăччĕ, анчах та шăплăх нумайлăха пымарĕ. Африка мурĕ пирĕн кỹршĕсем патне, Чулхула облаçне çитрĕ. Çак хăрушă чире уйрăм хушма хуçалăхра Дивеево районĕнче тупса палăртнă. Чир унччен Рязань облаçĕнчен ветеринари докуменчĕсĕр илсе килнĕ сысна çурисен пулнă. Çынсем выльăх-чĕрлĕхе илсе кĕмелли-тухмалли ветеринарипе санитари правилисене пăснине пула вирус кỹршĕсем патне çитнĕ. Час-часах вирус тискер чĕр-чунсенчен, хир сыснисенчен ерет. Чирпе кĕрешес лару-тăру вакцинаци çуккипе йывăрланать. Çавăнпа граждансен ветеринари службин сĕнĕвĕсене асра тытмалла. Выльăх-чĕрлĕх усракансен сыснасен Африка чирĕ питĕ хăрушă, вĕлерекен чир пулнине пĕлмелле. Чир вирусĕ питĕ тỹсĕмлĕ, çирĕп, вăл юн ĕçекен хурт-кăпшанкă урлă, тискер чĕрчунсем куçса çỹренипе, чирлĕ выльăха куçарнă чух та ерет.
Сыснасен Африка чуми пирĕн район территорине лекессинчен хỹтĕленес тесен халăхăн тивĕçлĕ мероприятисене пурнăçламалла. Мĕн тумалла-ха? - Чи малтанах сыснасене уйрăм хуçалăхран ниçта та кăлармалла мар; - выльăх-чĕрлĕх вилме е массăллă чирлеме пуçларĕ-тĕк ним тăхтаса тăмасăр ветеринари специалисчĕсене пĕлтермелле; ветеринари специалисчĕсем çитиччен чирлĕ выльăха уйрăм хупмалла; - вилнĕ выльăха ветеринари лабораторине харпăр хăй тĕллĕн илсе çитермелле мар; - выльăх-чĕрлĕх е ỹсен-тăран продукцине ветеринари службипе канашласа документсем илнĕ хыççăн кăна урăх çĕре куçарма, илсе кайма юрать; - апата вĕрилентернĕ хыççăн тин выльăха памалла; - выльăх-чĕрлĕх пỹлĕмĕсене вăхăтра тасатса тата дезинфекцилесе тăмалла. Асăннă мероприятисене пурнăçламасан тата чир-чĕр район территорине лексен чир сарăлнă вырăнти сыснасене пĕтĕмпех тĕп тăватпăр. Буферлă зонăра (50 км радиусра) вырнаçнă сыснасене те пусма тивет. Е иккĕ-ленỹллĕ района карантина илетпĕр. Вăл вăхăтра вара выльăх-чĕрлĕх, ỹсен-тăран продукцийĕсене илсе тухма та, кĕртме те юрамасть. Африка мурĕнчен сипленмелли меле халĕ те тупман-ха. Юлашкинчен тепĕр хут аса илтеретĕп, район территорийĕнче сыснасем вилеççĕ пулсан, хир сыснисен виллисене е сыснасене санкцисĕр куçарнине курсан ветеринари службине çак телефон номерĕсемпе пĕлтерме васкăр: 2-18-74, 2-19-64, 2-10-53.
Г.СТЕКОЛЬЩИКОВ, районти чĕрчунсен чирĕсемпе кĕрешекен станци начальникĕ.
Источник: "Пирěн пурнăç"