24 августа 2016 г.
Чи малтан Кавказра тупса палăртнă сыснасен Африка мурĕнчен темĕн тĕрлĕ сыхлансан та вăл Раççей тăрăх çурçĕрелле куçса пычĕ. Хăрушă чир Чулхула облаçне çитнине пĕлсен пирĕн те шиклĕх çуралнăччĕ. Асăрханса ку таранччен чиперех пурăннăччĕ-ха. Акă, августăн 18-мĕшĕнче Чăваш Ен Пуçлăхĕ Михаил Игнатьев ертсе пынипе Правительствăн асăрхаттарас, чрезвычайлă лару-тăрăва пĕтерес енĕпе ĕçлекен тата выльăх чирĕ анлă сарăлассипе кĕрешекен чрезвычайлă комиссисен пĕрлехи анлă ларăвĕ иртнĕ. Унта сăмах республикăра кĕтмен хăрушă амак сарăласран çулне пỹлме тата Пăрачкав районĕнчи (çак район хăрушлăхпа пĕрремĕш зонăна кĕрет) мĕнпур сыснана тĕп туса çĕр айне чикме йышăннă мероприятисене тăхтаса тăмасăр пурнăçламалли çинчен пынă. Михаил Васильевич августăн 17-мĕшĕнчен пуçласа Пăрачкав районĕнчи Напольное салинче карантин туса хуни, Африка чумипе кĕрешекен оперативлă штаб йĕркелени çинчен пĕлтернĕ. Карантина илнĕ районта сыснасене пусса тирпейлеме вуçех юрамасть. Района илсе кĕртме те, илсе тухма та чарнă. Çул çине тĕрĕслев посчĕсене тăратнă. Тăпран паха сийне хырса илсе çунтарса пытармалли вырăн хатĕрленĕ. Сыснана килтен илсе кайнăшăн кашни килограмм пуçне 102 тенкĕ, шăнтмăшран сысна ашне илнĕшĕн 146 тенкĕ тỹлеççĕ. Сыснасене тĕп тăвас ĕçсене Напольное салинче тата çывăхри ял тăрăхĕнче вĕçленĕ. Халĕ ĕçсем тепĕр тăватă ял тăрăхĕнче пурнăçланаççĕ. Çунтарнă хыççăн 3 метртан кая мар чавнă шăтăкра пытараççĕ. Урăхла май çук.
Пăлханма кирлĕ мар. Сыхă пулмалла
Пăрачкав районне хăрушлăхпа пĕрремĕш зонăна илнĕ. Хăрушлăх кăларса тăратакан иккĕмĕш зона 100 километра сарăлать. Пирĕн район хăрушлăхпа иккĕмĕш зонăна кĕрет. Çавăнпа районта сыснасене харпăр хăй тĕллĕн пусма, сутма, илсе тухма-кĕртме юрамасть. Хальхи вăхăтра ял тăрăхĕсен специалисчĕсем сысна усракан ял çыннисен списокне хатĕрлеççĕ. Список тăрăх ветспециалистсем кашни кунах кил хуçалăхĕсене çитсе сыснасене тĕрĕслесе тăрĕç. Граждансем правилăсене çирĕп пăхăнма тивĕç. Вĕсемпе килĕшнине, пăхăнма хатĕррине çынсен алă пусса çирĕплетмелле. Халăхăн çав тери хумханса ỹкме кирлĕ мар. Африка мурĕ чи малтанах сыснасемшĕн хăрушă. Вирус, тĕпрен илсен, хир сыснисенчен ерет. Ỹссе çитнĕ сыснасене пусма шутлатăр пулсан малтан ветеринари специалисчĕсене тĕрĕслеттермелле. Выльăх чирлĕ маррине ветспециалист çирĕплетсен аш-какайпа кил хуçалăхĕнче усă курма юрать, анчах та сутма юрамасть. Карантин вăхăтĕнче правилăсене пăсакансене административлă е уголовлă явап кĕтет. Район территорийĕнче хир сыснисем, хушма хуçалăхри сыснасем вилнĕ тĕслĕхсем пулсан е сыснасене санкцисĕр куçарнине, сутнине курсан граждансене çак телефон номерĕсемпе 2-19-64, 2-18-74, 2-10-53 шăнкăравлама ыйтатпăр.
Геннадий СТЕКОЛЬЩИКОВ, районти чĕрчунсен чирĕсемпе кĕрешекен станци начальникĕ.
Источник: "Пирěн пурнăç"