26 августа 2016 г.
Ĕнер, августăн 25-мĕшĕнче, районти педагогсем йăлана кĕнĕ августри конференцие пухăнчĕç. Унччен маларах, августăн 23-мĕшĕнче, Шупашкарта республикăри педагогсен конференцийĕ иртрĕ, унта пирĕн район делегацийĕ те хутшăнчĕ. Районти педагогсен çуллахи кунсем вĕçленнине, вĕренỹ çулĕ çывхарнине пĕлтерекен тĕлпулăвĕ кăçал "Муниципаллă вĕрентỹ тытăмĕнчи ĕç-хĕлĕн приоритетлă енĕсем" ятпа районти Культура çуртĕнче иртрĕ. Унччен пирĕн вĕрентекенсем Хĕрлĕ Чутайри вăтам шкула пухăнса калаçрĕç, тĕрлĕ секцисенче ĕçлерĕç.
Конференцире чи малтанах ачасене пĕлỹпе воспитани парас ĕçре курăмлă ĕçлесе пыракан педагогсене наградăсем парса чысларĕç. Çитĕнекен ăрăва вĕрентессипе тата воспитани парассипе тухăçлă ĕçленĕшĕн Çĕн Атикассинчи вăтам шкулта пуçламăш классене вĕрентекен Людмила Шишкова, Атнарти вăтам шкулта директорăн вĕрентỹпе воспитани енĕпе ĕçлекен Алина Канцелярова ЧР Патшалăх Канашĕн Хисеп грамотисене тивĕçрĕç. ЧР Патшалăх Канашĕн Тав сăмахне вара Хĕрлĕ Чутайри вăтам шкулта директорăн административлă хуçалăх ĕçĕ енĕпе тимлекен çумне Вероника Архипована парса чысларĕç.
Çитĕнекен ăрăва вĕрентес тата воспитани парас ĕçе пысăк тỹпе хывнăшăн Чăваш Республикин Вĕренỹ министерствин Хисеп грамотисене Хĕрлĕ Чутайри вăтам шкулта географи вĕрентекен Светлана Колендрейкина, Мăн Этмен шкулĕнче вырăс чĕлхипе литература вĕрентекен Вера Альгешкина, "Пилеш" ача сачĕн аслă воспитателĕ Лариса Васькова, Шулю шкулĕн директорĕ Марина Чамжайкина, вĕренỹ пайĕн Диагностикăпа консультаци центрĕн заведующийĕ Алевтина Савельева тивĕçрĕç.
Район пуçлăхĕ Александр Сте-панов Ачасен искусство шкулĕн преподавательне Людмила Кирю-шинана, Мăн Этмен шкулĕнче тăван ен культурине вĕрентекен Татьяна Горбунована, Шулю шкулĕнче истори вĕрентекен Галина Бровкинана çитĕнекен ăрăва вĕрентес тата воспитани парас ĕçре кăтартуллă ĕçленĕшĕн тав турĕ. Район администрацийĕн пуçлăхĕ Александр Башкиров ачасене çарпа патриотизм воспитанийĕ парас ĕçе пысăк тỹпе хывнăшăн Хĕрлĕ Чутай шкулĕн физкультура учительне Эдуард Романова, çитĕнекен ăрăва вĕрентес тата воспитани парас енĕпе кăтартуллă ĕçленĕшĕн "Пилеш" ача сачĕн воспитательне Людмила Максимована, нумай çул тỹрĕ кăмăлпа ĕçленĕшĕн тата ачасене патшалăх экзаменĕсене тухăçлă хатĕрленĕшĕн Хĕрлĕ Чутай шкулĕнче вырăс чĕлхипе литература вĕрентекен Надежда Белована Хисеп грамотисем парса саламларĕ.
Райадминистрацин вĕренỹ пайĕн Хисеп грамотисене Питĕркассинчи вăтам шкулта пуçламăш классене вĕрентекен Татьяна Хохлова, Хĕрлĕ Чутайри вăтам шкулти директорăн вĕренỹ енĕпе ĕçлекен çумĕ Татьяна Альгешкина, Ачасен пултарулăх çурчĕн педагогĕ Галина Артемьева, Атнарти "Пучах" ача сачĕн воспитателĕ Марина Кузьмина тивĕçрĕç.
Унтан çак кунсенче кăна райадми-нистрацин вĕренỹ пайĕн начальникĕн тивĕçĕсене пурнăçлама тытăннă Игорь Нестерович Живоев (унччен вăл Мăн Этмен шкулĕн директорĕ пулнă) сăмах илчĕ, районти вĕренỹ тытăмĕ мĕнле аталанса пыни пирки каласа пачĕ, малашлăхра тумалли ĕçсене палăртрĕ. Районти вĕрентỹ ĕçченĕсен профсоюз организацийĕн председателĕ Татьяна Улянды те ĕçтешĕсене салам-ларĕ, спортра палăрнă педагогсене укçан хавхалантарчĕ. Кăçалхи педконференци хыççăн çуралнă хамăн шухăшсемпе хаçатăн çитес номерĕсенче паллаштарăп.
Алина КАРПОВА.
Источник: "Пирěн пурнăç"