26 августа 2016 г.
Василий Вазин полиатлон енĕпе çĕршывăн пĕрлештернĕ командине кĕнĕ Питĕркассинчи Василий Вазин шкул саккинченех спортпа туслă. Халĕ вăл Чăваш патшалăх ялхуçалăх академийĕнче вĕренет, икĕ курс пĕтернĕ. Студент автосервис енĕпе специальность суйланă. Спорта юратакан каччăна аслă вĕренỹ заведенийĕнче тỹрех асăрханă. Çапла Вася кунти ытти спортсменсемпе тĕрлĕ ăмăртусене хутшăнма пуçланă.
Июлĕн 20-25-мĕшĕсенче ялхуçалăх академийĕн пилĕк студенчĕ, вăл шутра Василий Вазин та, полиатлон енĕпе Раççей чемпионатне хутшăнса Чăваш Ен ятне хỹтĕленĕ. Вĕсем пилĕк енлĕ тупăшнă: чупнă, ишнĕ, граната ывăтнă, пневматикăллă винтовкăран пенĕ, вăй гимнастики кăтартнă. Пирĕн ентеш чăваш спортсменĕсем хушшинче чи лайăх кăтартупа палăрнă. Вăл 100 метрлă дистанцие ирĕклĕ майпа 0,58.9 минутра ишсе тухнă, 18-20 çулхисен ушкăнĕнче тăваттăмĕш вырăн йышăннă. Василие Раççейĕн пĕрлештернĕ командине илнĕ. Çитес уйăхра ентеш командăпа пĕрле Ялтăра иртекен Европа чемпионатне хутшăнĕ.
Васьăн амăшĕ Людмила Вазина пĕлтернĕ тăрăх, Раççей чемпионачĕ хыççăн ывăлĕ икĕ эрнелĕхе килте каникулта пулнă, унтан каллех Шупашкара тренировкăсене тухса кайнă. Çамрăк спортсмен тĕрлĕ хуласенче иртнĕ пысăк шайри ăмăртусене унччен те хутшăннă. Европа чемпионатĕнче те пирĕн ентеш хăйĕн вăйĕпе пултарулăхне тивĕçлĕ кăтартса парасса шанатпăр.
А.ЗАМУТКИНА.
Источник: "Пирěн пурнăç"